ठाणे -भारतात विविध ठिकाणी पॉप्युलर फ्रंट ऑफ इंडिया या संघटनेचे बँक अकाउंट केंद्रीय तपास यंत्रणा प्रवर्तन निदेशालय (इ.डी) कडून जप्त करण्यात आले आहेत. या घटनेच्या निषेधार्थ भिवंडीतील पॉप्युलर फ्रंट ऑफ इंडिया संघटनेच्या वतीने भिवंडीत पोलिसांच्या विना परवानगीने आंदोलन केले होते. याप्रकरणी निजामपुरा पोलीस ठाण्यात गुन्हा दाखल करून आंदोलन करणाऱ्या 8 जणांना अटक केली आहे.
या आंदोलनकर्त्यांनी कोणत्याही प्रकारची शासकीय परवानगी न घेता शुक्रवारी भिवंडी शहर महानगरपालिकेच्या गेटसमोर आंदोलन घडवून आणले. विशेष म्हणजे आंदोलनापूर्वीच आंदोलनकर्त्यांना पोलिसांनी फौ.प्र.सं.कलम 149, 68 अन्वये नोटीस बजावली होती. मात्र, आंदोलनकर्त्यांनी नोटीसेचा भंग करून आंदोलन सुरू ठेवल्याने निजामपूर पोलीस ठाण्याचे पोलीस शिपाई विजय निंबा गवळी यांनी भिवंडी पॉप्युलर फ्रंट ऑफ इंडिया संघटनेच्या अध्यक्षांसह आंदोलनकर्त्या ८ जणांवर भादवि कलम १८८ प्रमाणे निजामपूर पोलीस ठाण्यात फौजदारी गुन्हा दाखल करून शुक्रवारी (दि. 3 जून) सायंकाळच्या सुमारास अटक केली आहे.