ठाणे - पंजाब महाराष्ट्र सहकारी बँकेवर (पीएमसी बँक) रिझर्व बँक ऑफ इंडियाने निर्बंध लादले आहेत. बँकेचे सर्व व्यवहार बंद करण्यात आलॆ आहेत. त्यामुळे मंगळवारी सकाळपासून पीएमसी बँकेच्या सर्व शाखांमध्ये सर्व व्यवहार ठप्प झाले आहे. तसेच बँकेचे ऑनलाइन व्यवहारही बंद आहेत. तर, एकावेळी हजार रुपयेच मिळत असल्याने डोंबिवलीतील वैतागलेल्या ग्राहकांनी पीएमसी बँकेच्या निळजे शाखेसमोर गर्दी केली आणि एकच गोंधळ उडाला.
रिझर्व्ह बँक ऑफ इंडियाने मुंबई स्थित पंजाब आणि महाराष्ट्र सहकारी बँकेवर सहा महिन्यांसाठी आर्थिक निर्बंध लादले आहेत. यानुसार बँकेला नवी कर्ज देणे, ठेवी स्वीकारण्यासह अनेक गोष्टींवर निर्बंध असतील. तर खातेदार केवळ १ हजार रुपये इतकीच रक्कम काढू शकतील. मंगळवारी सकाळी बँकेमार्फत ग्राहकांना याची माहिती देण्यात आली. त्यामुळे चिंतीत झालेले ग्राहक बँकेत मोठ्या संख्येने जमले असून, त्यांचे कर्मचाऱ्यांसोबत वाद सुरू आहेत. डोंबिवलीतल्या लोढा हेवन परिसरात पंजाब महाराष्ट्र बँकेची शाखा आहे. निळजे गावासह आजूबाजूची खेडी आणि लोढा हेवन, कसा रिओ, पलावा यासारख्या उच्चभ्रू वसाहतीतील ग्राहक इथल्या शाखेशी जोडली आहेत. त्यामुळे खेड्यातील नागरिकांनी त्यांची आयुष्यभराची कमाई तसेच पलावा सारख्या वसाहतीतील नागरिकांनी मोठ मोठ्या रकमेची ठेवी गुंतवणूक म्हणून ठेवली असल्याने चिंतेत असलेल्या ग्राहकांची बँकेत गर्दी होत आहे. मात्र, या शाखेतून एका वेळी हजार रुपये देण्यात येत असल्याने ग्राहकांची पंचाईत झाली आहे.