ठाणे -नवीन वर्षातील पहिले छायाकल्प चंद्रग्रहण शुक्रवारी (10 जानेवारी) मध्यरात्री पौष शाकंभरी पौर्णिमेच्या रात्री झाले. हे चंद्रग्रहण संपूर्ण भारतातून पहायला मिळाले. या चंद्रग्रहणाचा आनंद ठाणेकरांनी घेतला.
हेही वाचा -भिवंडीत कपड्याच्या गोडाऊनला आग, अग्निशामक दलाच्या चार गाड्या घटनास्थळी दाखल
खगोल अभ्यासक आणि पंचांगकर्ते दा. कृ. सोमण यांनी याविषयी अधिक माहिती देताना सांगितले, की ज्यावेळी चंद्रबिंब पृथ्वीच्या दाट छायेभोवती असणाऱ्या विरळ छायेमध्ये येते, त्यावेळी छायाकल्प म्हणजेच मांद्य चंद्रग्रहण दिसते. शुक्रवारी रात्री 10 वाजून 38 मिनिटांनी चंद्रबिंब पृथ्वीच्या विरळ छायेमध्ये येण्यास प्रारंभ झाला आणि रात्री 12 वाजून 40 मिनिटांनी जास्तीत जास्त म्हणजे 89 टक्के चंद्रबिंब पृथ्वीच्या विरळ छायेमध्ये आले होते. उत्तररात्री म्हणजेच मध्यरात्री 2 वाजून 42 मिनिटांनी संपूर्ण चंद्रबिंब पृथ्वीच्या विरळ छायेतून बाहेर पडले.
हेही वाचा -नाशवंत शेतमालाच्या वाहतुकीवरील बंदी उठवली
दरम्यान, हे चंद्रग्रहण साध्या डोळ्यांनी ही पाहता येण्यासारखे असल्याने ठाणेकरांनी या छायाकल्प चंद्रग्रहणाचा आनंद लुटला. पौर्णिमा असूनही ग्रहणात चंद्रबिंब कमी तेजस्वी दिसले. हे छायाकल्प चंद्रग्रहण उत्तर अमेरिकेचा उत्तर-पश्चिम भाग, आशिया, ऑस्ट्रेलिया, युरोप आणि दक्षिण अमेरिकेचा पूर्व भाग येथूनही दिसले.
