ठाणे -भिवंडी निजामपूर शहर महानगरपालिकेची तिजोरी समजण्यात येणाऱ्या स्थायी समिती सभापतीची निवणूक आज (सोमवारी) पार पडली. यामध्ये काँग्रेसचे मोहमद हलीम अन्सारी यांची स्थायी समिती सभापतीपदी निवड झाली आहे. त्यामुळे पालिकेची तिजोरीची चावी काँग्रेस-शिवसेना आघाडीकडे गेली आहे. याचाच परिणाम म्हणून महापौर असलेल्या कोणार्क-भाजप युतीची पंचायत होऊन बसली आहे.
हेही वाचा - झारखंडही भाजपच्या हातून निसटलं.. रघुवर दास यांनी राज्यपालांना सोपवला राजीनामा
काही दिवसांपूर्वीच काँग्रेसचे 18 नगरसेवक फोडून कोणार्क आघाडीने महापौर पद भाजपच्या पाठिंब्यावर पटकावले होते. तर काँग्रेसचे फुटीर गटाचे नगरसेवक इम्रान खान उपमहापौरपदी निवडून आले. त्यामुळे याही निवडणुकीत काँग्रेसला पराभवाची भीती होती. मात्र, ऐनवेळी फुटीर काँग्रेस गटाचे नगरसेवक इम्रान खान तर भाजपचे सुमित पाटील यांनी उमेदवारी अर्ज मागे घेतले. त्यामुळे स्थायी समिती कँग्रेसचे हालीम अन्सारी यांची सभापती म्हणून बिनविरोध निवड झाली. पीठासीन अधिकारी डॉ. राजेश नार्वेकर व आयुक्त डॉ. प्रवीण आष्टीकर यांनी हलीम अन्सारी यांचे पुष्पगुच्छ देऊन स्वागत केले. हालीम अन्सारी सभापती यांची निवड झाल्यावर लगेच त्यांनी मावळते सभापती मदन (बुवा) नाईक यांच्याकडून स्थायी समिती सभापतीपदाचा कार्यभार स्वीकारून कामाला सुरुवात केली. यावेळी जिल्हा नगरपालिका प्रशासन अधिकारी प्रकाश बोरसे, उपायुक्त दीपक कुरुळेकर, नगरसचिव अनिल प्रधान, जनसंपर्क अधिकारी मिलिंद पळसुले, उपस्थित होते.
स्थायी समितीमध्ये एकूण 16 सदस्य असून त्यामध्ये काँग्रेसचे 8, भाजप 4 , शिवसेना 2, कोणार्क 1 ,सपा 1 अशी पक्षनिहाय सदस्य संख्या आहे. नुकत्याच पार पडलेल्या महापौर, उपमहापौर पदाच्या निवडणूकीत काँग्रेसचे 18 नगरसेवक फुटल्याने काँग्रेसला सत्ता गमवावी लागल्याने मोठा धक्का बसला होता. विशेष म्हणजे काँग्रेसच्या 18 फुटीर नगरसेवकांमध्ये 4 नगरसेवक स्थायी समितीचे सदस्य आहेत. त्यामुळे हे सदस्य भाजप उमेदवार सुमित पाटील यांच्या गोटात गेल्याचे सांगण्यात आले होते. मात्र, आज पार पडलेल्या निवडणुकीत भाजपने माघार घेतल्याने अखेर ही अफवाच ठरली.