चांदनी बारमध्ये अश्लील नृत्य करताना 22 बारबालांसह मॅनेजर अटक

कल्याण अप्पर पोलीस आयुक्तांच्या विशेष पथकाने ही छापेमारी केली आहे. या विशेष पोलीस पथकाला गुप्त माहिती मिळाल्यानंंतर ही कारवाई करण्यात आली.

ठाणे -वादग्रस्त असलेल्या चांदणी बारमधून ऑर्केस्ट्राच्या तालावर मद्यपी ग्राहकांना आकर्षित करण्यासाठी अश्लील हावभाव करून नृत्य करणाऱ्या 22 बारबालांसह मॅनेजरला अटक करण्यात आली आहे. ही घटना उल्हासनगर कॅम्प नंबर 3 परिसरात असलेल्या चांदणी ऑर्केस्ट्रा बारमध्ये घडली.

कल्याण अप्पर पोलीस आयुक्तांच्या विशेष पथकाने ही छापेमारी केली आहे. या विशेष पोलीस पथकाला खबर मिळाली होती, की उल्हासनगरमधील कॅम्प नंबर 3 परिसरात असलेल्या चांदनी बारमध्ये लाईव्ह ऑर्केस्ट्राच्या नावाखाली मद्यपी ग्राहकांना आकर्षित करण्यासाठी बारबाला तोकडे कपडे घालून अश्लील नृत्य करत आहेत. त्यानंतर रात्रीच्या सुमारास या पोलीस पथकाने या बारवर छापा मारला.

छापेमारी दरम्यान 22 बारबालांना स्वतः च्या आर्थिक फायद्यासाठी चांदनी बारचा मॅनेजर त्यांच्याकडून लाइव्ह ऑर्केस्ट्रा बारच्या नावाखाली अश्लील हावभाव करून नृत्य करत असल्याचे आढळून आले. यामुळे पोलिसांनी चांदनी बारच्या मॅनेजरसह 22 बारबालांवर कारवाई करत त्यांना ताब्यात घेऊन अटक केली आहे.

दरम्यान, उल्हासनगर शहरात अनेक ठिकाणी लाईव्ह ऑर्केस्ट्रा बार आहेत. त्या बारमध्येही अश्लील कृत्य स्थानिक पोलिसांची मेहरनजर असल्यानेच सुरू असल्याची चर्चा वादग्रस्त चांदनी बारच्या छाप्यामुळे नागरिक करता आहेत.