ठाण्यात अभिनेत्री मातेकडून मुलीची हत्या; स्वतःही घेतला गळफास

ठाण्यात एका अभिनेत्री मातेकडून मुलीची हत्या करण्यात आली. त्यानंतर तिने स्वतःदेखील आत्महत्या केल्याची घटना घडली. ही माता अभिनेत्री असून छोट्या-मोठ्या भूमिका साकारत होती.

ठाणे - आईने स्वतःच्या मुलीची हत्या करून स्वतःदेखील गळफास लावून आत्महत्या केल्याचा प्रकार समोर आला आहे. कळवा बाजारपेठ परिसरात शुक्रवारी सकाळी ही घटना घडली. त्यामुळे परिसरात खळबळ उडाली आहे.

प्रशांत पारकर हे व्यक्ती आपल्या कुटुंबीयांसोबत बाजारपेठ परिसरातीतल गौरीसमुन सोसायटीमध्ये दुसऱ्या माळ्यावर राहतात. ते नेहमीप्रमाणे आज सकाळी देखील जिममध्ये गेले होते. त्यावेळी त्यांची पत्नी प्रज्ञा पारकर आणि मुलगी श्रृती दोघीच घरी होत्या. शुक्रवारी सकाळी ८ वाजण्याच्या सुमारास प्रज्ञाने मुलगी श्रृतीचा गळा दाबून हत्या केली. त्यानंतर स्वतः गळफास लावून आत्महत्या केली.

प्रशांत घरी आल्यावर दरवाजा उघडताच त्यांना धक्का बसला. घटनास्थळी सुसाईड नोट मिळाली आहे. त्यामध्ये 'ही हत्या मी केली असून त्यास कोणास जबाबदार धरू नये' असे लिहिलेले आढळून आले.

दरम्यान मृत प्रज्ञा ही अभिनेत्री असून छोट्या-मोठ्या भूमिका साकारत होती. तिचा स्वभाव रागीट स्वरुपाचा असल्याने तिने कौटुंबीक कारणावरून हे पाऊस उचलल्याचे बोलले जात आहे.