ठाणे-संचारबंदी असतानाही डोंबिवलीत पार पडलेला 'तो' लग्न सोहळा कल्याण डोंबिवलीकरांचे जीव धोक्यात घालणारा ठरला आहे. या लग्न सोहोळ्याला उपस्थित असलेल्यांपैकी ३ नवे कोरोना बाधित रुग्ण, तर एक रूग्‍ण कोरोना बाधित रुग्णाचा सहवासित असल्याचे समोर आले आहे. तर, अजून एक रुग्ण कल्याण पूर्व भागात आढळल्याने रुग्णांची संख्या ५ वर येऊन ठेपली आहे. त्यामुळे, आता महापालिका क्षेत्रातील कोरोना बाधित रुग्णांची संख्या १९ च्या घरात पोहोचली आहे.
आज आढळून आलेल्या नवीन रुग्‍णांपैकी ४ रुग्ण हे डोंबिवली पूर्व भागातील असून १ रुग्ण कल्याण पूर्व भागातील आहे. डोंबिवली येथील ३ रुग्ण हे लग्न सोहळ्याशी संबधीत असून १ रुग्ण कोरोना बाधित रुग्णाचा सहवासित आहे. नवीन रुग्‍णांपैकी कल्याण पूर्व येथील रुग्ण हा एका खाजगी रुग्‍णालयात उपचार घेत असून डोंबिवली येथील ४ रुग्ण मुंबईतील कस्‍तुरबा रुग्‍णालयात उपचार घेत आहेत. कल्याण शहरात प्रथम आढळलेला कोरोना बाधित रुग्ण व त्‍याचे दोन कुटुंबिय उपचारांती पूर्णपणे बरे झाले आहेत. सध्‍या कल्याण डोंबिवली महानगरपालिका क्षेत्रातील पुनर्तपासणीअंती सुट्टी दिलेल्‍या रुग्णांची संख्या आता ४ झाली आहे.