ठाणे - कल्याण, डोंबिवली महापालिका हद्दीत कोरोनाच्या दुसऱ्या लाटेत अवघ्या दोन महिने ११ दिवसांत ४०२ जणांचा कोरोना आजाराने मृत्यू झाला आहे. ही लाट १५ मे नंतर ओसरणार असली, तरी पुन्हा जुलै, ऑगस्टमध्ये तिसऱ्या लाटेची शक्यता व्यक्त केली जात आहे.
कोरोनाची पहिली लाट मार्च २०२० मध्ये सुरू झाली. त्यावेळी महापालिका हद्दीत दिवसाला ३०० ते ४५० रुग्ण आढळत होते. मृत्यूचे प्रमाण आटोक्यात होते. मात्र जुलै २०२० मध्ये एका दिवसांत ६६४ रुग्ण आढळले होते. त्यानंतर मात्र दिवाळीनंतर रुग्ण संख्या घटू लागली होती. तर जानेवारीत पहिली लाट ओसरल्याने दिलासा मिळाला होता. मात्र, १७ फेब्रुवारी २०२१ पासून पुन्हा रुग्ण संख्या वाढू लागली. कोरोनाच्या दुसऱ्या लाटेत दररोज एक ते दोन हजारांच्या संख्येने रुग्ण आढळत आहेत. त्यामुळे रुग्णालयात बेड, व्हेंटिलेटर, ऑक्सिजन, रेमडेसिवीर इंजेक्शनचा तुटवडा निर्माण झाला आहे. त्यामुळे या सगळ्या गोष्टींची उपलब्धता, पुरवठ्याच्या ऑडिटसाठी पथकांची नियुक्ती करण्यात आली आहे. मात्र ऑक्सिजन, रेमडेसिवीर यांची वेळेत उपलब्धता न झाल्याने अनेकांना आपला जीव गमवावा लागला.
आजही आढळले ४१५ रुग्ण