सोलापूर- उजनी आणि वीर धरणातून सोडण्यात आलेल्या पाण्यामुळे पंढरपुरात भीमानदीला पूर आला आहे. नदीकाठच्या सखल भागात पाणी साचले असून अनेक झोपडपटट्यांमध्ये पुराचे पाणी घुसले आहे. तर येथील नागरिकांना सुरक्षितस्थळी स्थलांतरीत करण्यात आले आहे. श्री विठ्ठल-रूक्मिणी मंदिर व प्रशासन यांच्या मदतीने पूरग्रस्त नागरिकांचे स्थलांतर करण्यात आले आहे.
पूरग्रस्तांच्या मदतीसाठी मंदिर समितीकडून अन्नधान्याचे वाटप
आज सकाळी वीर धरणातून ७० तर उजनी धरणातून १ लाख ५० हजार क्युसेक पाणी सोडण्यात आले आहे. त्यामुळे पंढरपुरात भीमानदीने धोक्याची पातळी ओलांडली आहे. नदीकाठच्या व्यासनारायण, अंबाबाई पटांगण, लखुबाई आदी भागातील झोपडपट्ट्यांमध्ये पुराचे पाणी शिरले आहे. येथील सुमारे ७०० कुटुंबांना प्रशासनाने सुरक्षितस्थळी स्तलांतरीत केले आहे.