सोलापूर - जिल्हा परिषदेच्या शाळेत शिक्षक असलेले किरण बाबर यांनी स्व अनुभवातून '१९ खडी' तयार केली आहे. ही १९ खडी राज्यातील शिक्षकांची पसंती ठरत आहे. अवघ्या ४५ दिवसांत किरण बाबर यांच्या कृतीयुक्त १९ खडीच्या माध्यमातून अंगणवाडीचा मुलगाही चांगल्या पद्धतीने मराठी वाचत आहे. त्यांच्या या उपक्रमाचे सर्वत्र कौतुक होत आहे.
किरण बाबर हे गेल्या २२ वर्षांपासून सोलापूर जिल्ह्यातील जिल्हा परिषद शाळेत शिक्षक म्हणून कर्यरत आहेत. या २२ वर्षाच्या त्यांच्या नोकरीमध्ये जवळपास २० वर्षे त्यांनी पहिलीच्या वर्गावर ज्ञानदानाचे काम केले आहे. या २० वर्षांत जवळपास १८ वर्ष त्यांनी सोलापूर जिल्ह्यातील कन्नड भाषिक गावांमध्ये मराठीच्या शाळेवर शिक्षक म्हणून काम केले आहे. सोलापूर जिल्ह्यातील दक्षिण सोलापूर तसेच अक्कलकोट तालुक्यामध्ये कन्नड भाषा मोठ्या प्रमाणावर बोलली जाते. त्यामुळेच या दोन तालुक्यांमध्ये महाराष्ट्र शासनाच्या जिल्हा परिषदेच्या कन्नड शाळाही आहेत.
सोलापुरातील किरण बाबर यांची '१९ खडी' ठरतेय शैक्षणिक क्रांती दक्षिण सोलापूर आणि अक्कलकोट या तालुक्यांमध्ये कन्नड भाषिक संख्या मोठ्या प्रमाणावर असल्यामुळे त्या तालुक्यामध्ये कन्नड शाळां सोबतच मराठी शाळादेखील आहेत. ज्या मुलांची मातृभाषा कन्नड आहे, अशा मुलांना मराठी शिकवत असताना मोठ्या अडचणी येत होत्या. किरण बाबर हे जवळपास १८ वर्ष, ज्यांची मातृभाषा कन्नड आहे, अशा मुलांना पहिलीमध्ये मराठी शिकविण्याचे काम करत होते. कन्नड मातृभाषा असलेल्या विद्यार्थ्यांना मराठी शिकवत असताना येणाऱ्या अडचणी आणि त्या विद्यार्थ्यांना मराठी कशा पद्धतीने सोप्यात सोपी करून शिकवता येईल याचा अनुभव त्यांना येत गेला. या विद्यार्थ्यांना कृतीयुक्त शिक्षण देतानाच किरण बाबर यांनी त्यांची स्वतःची 19 खडी तयार केली. या 19 खडीच्या माध्यमातूनच त्यांनी ज्यांची मातृभाषा मराठी नाही, अशा विद्यार्थ्यांना अवघ्या दोन महिन्यांच्या काळातच मराठी वाचायला शिकवले.
सोलापूर-विजापूर राष्ट्रीय महामार्गापासून ४० किलोमीटर अंतरावर असलेल्या चिंचपूर या कन्नड भाषिक गावात किरण बाबर यांनी अध्यापनाचे काम सुरू केले होते. किरण बाबर यांनी सर्वच मुलांची मातृभाषा कन्नड असतानादेखील आपल्या अनुभवातून कृतीयुक्त आणि मनोरंजन पद्धतीने अध्यापन पद्धती विकसित केली आहे. यातूनच 19 खडीचा जन्म झाला आहे. त्यांच्या या उपक्रमाचे सर्वत्र कौतुक होत आहे.
किरण बाबर यांनी स्वतःच्या अनुभवातून तयार केलेल्या १९ खडीमुळे अंगणवाडीचे तसेच पहिलीचे विद्यार्थी फक्त दीड ते दोन महिन्यात मराठी वाचायला शिकतात. किरण बाबर यांनी नव्याने विकसित केलेल्या अध्यापन पद्धतीमुळे इतर शिक्षकांनादेखील त्याचा फायदा मिळू लागलेला आहे. किरण बाबर यांच्या प्रशिक्षणामुळे सोलापूर जिल्ह्यातील अनेक शाळांमधील विद्यार्थी हे दोन महिन्यात मराठी वाचायला शिकलेले आहेत.
