'संविधानामुळेच मला जिल्हा परिषदेच्या अध्यक्षपदाचा बहुमान'

यावेळी अध्यक्ष कांबळे यांनी आपला जीवनप्रवास उलगडताना शालेय जीवनातील आठवणींना उजाळा दिला आहे. शेती आणि पशुपालन या विषयावर विविध प्रकारे भाष्य करत त्यांनी ग्रामीण भागातील जीवनशैलीवरही प्रकाश टाकला.

सोलापूर- भारताच्या संविधानामुळेच मला जिल्हा परिषदेच्या अध्यक्षपदाचा बहुमान मिळाला असल्याची भावना सोलापूर जिल्हा परिषदेचे अध्यक्ष अनिरुद्ध कांबळे यांनी व्यक्त केली आहे. सोलापूर जिल्हा परिषदेच्या निवडीची प्रक्रिया नुकतीच पार पडली. त्यामध्ये करमाळा तालुक्यातील केमचे अनिरुद्ध कांबळे यांची अध्यक्षपदी वर्णी लागली. त्या पार्श्वभूमीवर करमाळा पंचायत समितीच्या शिक्षण विभागामार्फत केम येथे आयोजित शिक्षण परिषदेच्या कार्यक्रमात ते बोलत होते.

यावेळी अध्यक्ष कांबळे यांनी आपला जीवनप्रवास उलगडताना शालेय जीवनातील आठवणींना उजाळा दिला आहे. शेती आणि पशुपालन या विषयावर विविध प्रकारे भाष्य करत त्यांनी ग्रामीण भागातील जीवनशैलीवरही प्रकाश टाकला. तसेच केममधील अजित तळेकर यांनी अध्यक्ष पदासाठी केलेल्या विशेष प्रयत्नांचा उल्लेख यावेळी त्यांनी केला. अध्यक्ष पदाच्या निवडीच्या प्रक्रियेत त्यांनी निभावलेल्या किंगमेकरच्या भूमिकेचा वारंवार उल्लेख उपस्थितांकडून करण्यात आला.

जिल्हा परिषद शाळेतून शिक्षण घेतलेले विद्यार्थी आज प्रशासनामध्ये उच्च पदावर काम करताना दिसून येतात. ग्रामीण भागातील शिक्षण हे अधिकाधिक समृद्ध होण्यासाठी पंचायत समितीद्वारे विशेष प्रयत्न केले जातील, असे आश्वासन करमाळा पंचायत समितीचे सभापती गहिनीनाथ ननवरे यांनी यावेळी दिले.

माळशिरस तालुक्यातील व्याख्याते प्रशांत सरूडकर यांनी 'शिक्षण काल आज आणि उद्या'या विषयावर शिक्षकांना मार्गदर्शन केले. यावेळी कार्यक्रमाचे अध्यक्ष म्हणून माजी जिल्हा परिषद सदस्य दिलीप तळेकर, करमाळा पंचायत समिती चे सभापती गहिनीनाथ ननवरे, उपसभापती दत्तात्रय सरडे, माजी सभापती शेखर गाडे, जिल्हा परिषद सदस्य निलकंठ देशमुख, यांच्यासह करमाळा तालुका पंचायत समिती शिक्षण विभागाचे गटशिक्षणाधिकारी अधिकारी राजाराम भोंग, आदि अधिकारी कर्मचारी वर्ग उपस्थित होते.