Solapur Rubber Factory: गुजरात रबर फॅक्टरीला भीषण आग, कोट्यवधी रुपयांची मालमत्ता भस्मसात

अक्कलकोट रोड असलेल्या एमआयडीसीतील गुजरात रबर फॅक्टरीला बुधवारी पहाटे भीषण आग लागली.आगीत कोट्यावधी रुपयांचे रबर जळून राख झाले आहे. बार्शी येथून 50 अग्नीशमन दलाच्या गाड्या पाचारण करण्यात आल्या. प्राथमिक माहितीनुसार आगीत जीवितहानी झाली नसून वित्तहानी मोठ्या प्रमाणात झाली आहे.

सोलापूर: गुजरात रबर फॅक्टरी ही मूळची गुजरात राज्यातील आहे. देशभरात यांच्या विविध जिल्ह्यात शाखा आहेत. आंतरराष्ट्रीय पातळीवर गुजरात रबर फॅक्टरीचे रबर प्रसिद्ध आहे. आंतरराष्ट्रीय पातळीवर अनेक दुचाकी व चार चाकी वाहन कंपन्याच्या टायरसाठी गुजरात रबर फॅक्टरी रबर निर्यात करते. अक्कलकोट रोड एमआयडीसी मध्ये लागलेल्या आगीचे जवळपास 5 किलोमीटरवर धुराचे लोण दिसत होते.अक्कलकोट रोड एमआयडीसीमधील रबर फॅक्टरीला आग लागल्यानंतर आसपासच्या गारमेंट कारखान्यांनाही आगीने घेरले होते. मध्यरात्री दीडच्या सुमारास लागलेली आग सकाळी साडेसहापर्यंत धुमसत होती. आगीचे नेमके कारण अद्याप समोर आले नाही. प्राथमिक माहितीनुसार आगीत जीवितहानी झाली नसून वित्तहानी मोठ्या प्रमाणात झाली आहे.

50 गाड्यांने पाणी फवारले: सोलापूर महापालिका, तसेच एमआयडीसी, एनटीपिसी, अक्कलकोट शहर, बार्शी येथून 50 अग्नीशमन दलाच्या गाड्या पाचारण करूनही आग आटोक्यात आली नाही. परिसरातील इतर कारखानदार हवालदिल झाले आहेत. मिळेल ते साहित्य हलवण्यासाठी शर्थीचे प्रयत्न सुरू होते. मनपाचे अग्निशमन दल अधिकारी केदार आवटे यांच्यां सह, २५ जणांची टीम आग नियंत्रणात आणण्यासाठी सक्रिय झाली होती. तर सोलापूर शहर पोलीस फौज फाटा तळ ठोकून आहे. आगीत कोट्यावधी रुपयांची मालमत्ता भस्मसात झाली अशी प्राथमिक माहिती समोर आहे. तर गुजरात रबर फॅक्टरी मध्ये सोलापुर शहरातील युनिटमध्ये शेकडो कर्मचारी काम करतात. मूळची गुजरात राज्यातील ही कंपनी ,देशभरात अनेक ठिकाणी याचे युनिट कार्यरत आहेत. आंतरराष्ट्रीय पातळीवर असलेले दुचाकी व चार चाकी वाहन कंपन्यासाठी गुजरात रबर फॅक्टरीमधून उच्च दर्जाचे टायरचे रबर निर्यात केले जाते.

इंदोर येथेही असाच प्रकार :याआधीही मध्यप्रदेशातील इंदूरच्या एसआर कंपाऊंड परिसरात भीषण आग लागली होती. या आगीत काही मजूर जखमी झाले होते. कारखान्यात सुमारे 70 मजूर उपस्थित होते, आगीमुळे धुराचे लोट पसरल्याने अनेक मजूर आत पडले होते. रहदारीमुळे अग्निशमन दलाच्या गाड्याही उशिराने घटनास्थळी पोहोचल्या, त्यामुळे आगीने भीषण रूप धारण केले होते. ज्वालाग्राही आम्लपदार्थ सांडल्यामुळे एसआर परिसरात खळबळ उडाली, त्यामुळे कारखान्याच्या आजूबाजूला असलेली घरे आणि कारखाने आगीच्या भक्ष्यस्थानी आले होते. एसके कंपाऊंड येथील फायबर कारखान्यात ज्या ठिकाणी आग लागली, तेथे फायबर बनवण्यासाठी रसायने तयार करण्याचे काम केले जाते. बहुतांश साहित्य ज्वलनशील असूनही कारखान्यात अग्निशमन व्यवस्था नव्हती. सकाळी नऊ वाजण्याच्या सुमारास अचानक कारखान्याच्या एका भागात आग लागली, जी हळूहळू पसरली, यादरम्यान काही मजूरही काम करण्यासाठी कारखान्यात पोहोचले होते. आगीने भीषण रूप धारण केल्याने काही मजुरांचा मृत्यू झाला होता.