दिल्लीतील शेतकरी आंदोलनाचे सोलापुरात पडसाद; माकपचे 'रास्ता रोको' आंदोलन

दिल्लीत सुरू असलेल्या शेतकरी आंदोलनाला पाठींबा म्हणून साोलापूर येथे माकपच्यावतीने 'रास्ता रोको' आंदोलन करण्यात आले. यावेळी हे आंदोलन दडपण्याचा प्रयत्न पोलीसांनी केला.

सोलापूर - दिल्ली येथे सुरू असलेल्या शेतकरी आंदोलनाचे सोलापुरात पडसाद उमटले आहेत. आज गुरुवारी शहरात सकाळी गेंट्याल चौक येथे सिटू, डीवायएफआय, एसएफआय, जनवादी महिला संघटनांच्यावतीने 'रास्ता रोको' आंदोलन करण्यात आले. मार्क्सवादी कम्युनिस्ट पक्षाशी संलग्न असलेल्या विविध संघटनांच्यावतीने माजी आमदार नरसय्या आडम आणि 'सिटू'चे महासचिव एम.एच.शेख यांच्या नेतृत्वाखाली हे आंदोलन करण्यात आल्याने पोलिसांची तारांबळ उडाली होती.

दिल्लीतील शेतकरी आंदोलनाला पाठिंबा-

दिल्ली येथे कृषी कायद्याविरोधात आंदोलन सुरू असून त्या आंदोलनाला पाठिंबा देण्याकरिता हे आंदोलन करण्यात आले. गेंट्याल चौक परिसरात सकाळपासूनच कामगारांचे जथे यायला सुरुवात झाली होती. नलिनी कलबुर्गी, युसूफ मेजर, नासीमा शेख आदी माकपचे नेते गनिमी काव्याने एका बाजूला कार्यकर्ते गोळा करताना दिसले, तर दुसऱ्या बाजूला पोलीस हे आंदोलन उधळून टाकण्याच्या तयारीत होते.

शेतकरी आणि कामगार कायदे मागे घ्या-

केंद्र सरकारने जर वेळेवर सकारात्मक निर्णय घेतला नाही, तर देशभरातील शेतकऱ्यांच्या संघटना दिल्लीला रवाना होतील, असा इशारा यावेळी 'सिटू' चे महासचिव एम.एच.शेख यांनी दिला. शेतकरी आणि कामगार विरोधी कायदे जोपर्यंत केंद्र सरकार परत घेत नाही, तोपर्यंत देशभरात असे आंदोलन होतच राहतील, असेही शेख यांनी म्हटले.

सोलापूर शहरातून जाणाऱ्या महामार्गावर चक्का जाम करणार -

संक्रांतीनंतर केंद्र सरकारविरुद्ध 50 हजार कामगारांना घेऊन गुरुनानक चौक ते शांती चौक पाणीटाकीपर्यंत रस्ता ब्लॉक करण्यात येईल, असा इशारा आडम यांनी दिला. 'सिटू' आणि विविध संघटनांचे असंख्य कार्यकर्ते या आंदोलनात सहभागी झाले होते. काही वेळातच पोलीसांनी घटनास्थळी दाखल होत आंदोलनकर्त्यांना ताब्यात घेतले.