सोलापुरात शेळीपालन घोटाळा; कोट्यवधी रुपयांची फसवणूक करून आरोपी फरार

बरकत गोट फार्मच्या माध्यमातून अनेकांना कोट्यवधींचा गंडा घातल्याचा गुन्हा आर्थिक गुन्हे शाखेत दाखल झाला आहे. याबाबत आर्थिक गुन्हे शाखेच्या पोलिसांनी कारवाईचा फास आवळला आहे.अली नवाज इमाम सय्यद(रा. अंबिका नगर, नई जिंदगी सोलापूर) या आरोपीस अटक करण्यात आले आहे.तर मुख्य आरोपी अकिबखान पठाण फरार झाला आहे.

सोलापूर- शहरातील सोरेगाव हद्दीत सुरू असलेल्या शेळीपालन संदर्भातील एका कंपनीने कोट्यवधीची फसवणूक केल्याचा प्रकार समोर आला आहे. बरकत गोट फार्म असे त्या कंपनीचे नाव असून शेळी पालन व्यवसायात गुंतवणूक करायला लावून या कंपनीने कर्नाटक आणि सोलापूर जिल्ह्यातील अनेक गुंतवणूक दारांची फसवणूक केली आहे. सोरेगाव हद्दीतील बरकत गोट फार्मच्या अकीबखान हारूनखान पठाण( रा ,श्री शैल मल्लिकार्जुन नगर, होटगी रोड, सोलापूर)याने ही फसवणूक केली आहे. सध्या हा संशयित आरोपी फरार आहे. तर त्याचा साथीदार अलीनवाज इमाम सय्यद(रा नई जिंदगी, सोलापूर) यास आर्थिक गुन्हे शाखेने अटक केली आहे. या शेळी पालन व्यावसायात जवळपास 3 कोटी 23 लाख रुपयांचा घोटाळा समोर आला आहे. हा आकडा आणखीन वाढण्याची शक्यता वर्तवण्यात येत आहे.

विजापूर रोडवरील अल हिलाल बिजनेस कन्सेप्ट ( पत्ता.वॉटर फ्रंट इमारत,विजापुर रोड) या कंपनीच्या माध्यमातून लोकांना पैसे गुंतवणूक करून मोठा परतावा दिला जाईल, असे आमिष दाखवण्यात आले. अल हिलाल ही कंपनी बरकत गोट फार्मची शाखा आहे. येथूनच अकिबखानने घोटाळ्यास सुरुवात केली. 2017 पासून या कंपनीमध्ये काही नागरिकांनी गुंतवणूक करण्यास सुरुवात केली. त्यानुसार कंपनीमध्ये जवळपास 3 कोटी 23 लाख 5 हजार 500 रुपयांची गुंतवणूक झाली. परंतु गेल्या डिसेंबर 2019 पासून अल हिलाल या कंपनीने विजापूर रोड वरील वॉटर फ्रंट इमारती मधील कार्यालय बंद केले आणि गुंतवणूक दारांचे पैसे देण्यासही टाळाटाळ केली.

बरकत गोट फार्म यांच्याकडून आपली फसवणूक झाल्याचे काही गुंतवणूकदारांच्या लक्षात आले. त्यानंतर गुंतवणूकदार सर्फराज अमीर शेख( वय 43 वर्ष आदर्श नगर, लक्ष्मी नारायण टॉकीज च्या मागे, सोलापूर) यांनी या प्रकरणी तत्काळ पोलिसात तक्रार दाखल केली. सर्फराज शेख यांनी 16 लाख रुपयांपर्यंतची या कंपनीत गुंतवणूक केली होती. तसेच अब्दुल वहाब आंदेवाडी यांनी 10 लाख रुपये शेळी उद्योगात गुंतवणूकीसाठी अकिबखान यास चेक स्वरूपात दिले होते. तर फयाज अब्दुल मजीद अडते यांनी 20 लाख, सलीम अब्दुल मजीद यांनी 5 लाख, शिफा सलीम शेख यांनी 5 लाख, मूजफ्फर उस्मान शेख यांनी 9 लाख, मजहर शेख यांनी 10 लाख, तौफिक दाऊद नदाफ यांनी 5 लाख, रुकमोद्दीन मुजावर यांचे 5 लाख, रिजवान पिरजादे 5 लाख अशी अन्य गुंतवणूक दारांची नावे आहेत. त्यांना अकिबखान याने वेगवेगळी आश्वासने देत आकर्षित करत शेळी उद्योगात गुंतवणूक करण्यास भाग पाडले होते.

पोलिसांनी फसवणूक केलेली रक्कम कोटींच्या घरात असल्याने हे प्रकरण गुन्हा आर्थिक गुन्हे शाखेकडे वर्ग केले. त्यानंतर या प्रकरणी गुन्हे शाखेने मंगळवारी सायंकाळी पाचच्या सुमारास अली नवाज सय्यद (नई जिंदगी) याला अटक केली आहे. बुधवारी त्याला कोर्टासमोर हजर केले असता, संशयित आरोपीला 15 सप्टेंबर पर्यंत पोलीस कोठडी सुनावली आहे. याचा अधिक तपास आर्थिक गुन्हे शाखेचे वरीष्ठ पोलीस निरीक्षक संजय पवार सहायक पोलीस निरीक्षक तुकाराम घाडगे करत आहेत.