नवीन वर्षानिमित्त भाविकांची पंढरपुरात गर्दी

नववर्ष तसेच सलग असलेल्या सुट्यांमुळे भाविकांनी पंढरपुरात गर्दी केली आहे. पहाटेपासून भाविक पंढरपुरात विठ्ठलाचे दर्शन घेण्यासाठी दाखल होत आहेत. त्यामुळे स्टेशन रस्ता, शिवाजी चौक, भक्तीमार्ग आणि चंद्रभागा वाळवंटात गर्दी पाहायला मिळत आहे.

पंढरपूर - नववर्ष तसेच सलग असलेल्या सुट्यांमुळे भाविकांनी पंढरपुरात गर्दी केली आहे. पहाटेपासून भाविक पंढरपुरात विठ्ठलाचे दर्शन घेण्यासाठी दाखल होत आहेत. त्यामुळे स्टेशन रस्ता, शिवाजी चौक, भक्तीमार्ग आणि चंद्रभागा वाळवंटात गर्दी पाहायला मिळत आहे. मात्र भाविक कोरोनाच्या पार्श्वभूमीवर कोणतीही खबरदारी घेताना दिसत नाही. कडाक्याच्या थंडीत पवित्र स्नान झाल्यानंतर ऑनलाईन बुकींग केलेल्या भाविकांनी पाहाटेपासून दर्शनासाठी रांगा लावल्या आहेत.

ऑनलाईन बुकींगची संख्या वाढवण्याची मागणी

नवीन वर्षानिमित्त पंढरपुरात भाविकांची गर्दी वाढत आहे. कोरोनाच्या पार्श्वभूमीवर दर्शनासाठी ऑनलाईन नोंदणी आवश्यक आहे. मात्र जे भाविक ऑनलाईन नोंदणी करू शकले नाही, त्यांनी बाहेरूनच विठ्ठल आणि नामदेव पायरीचे दर्शन घेतले. विठ्ठल मंदिर समितीकडून विठूरायाच्या दर्शनासाठी दिवसाला 4800 भाविकांना ऑनलाइन दर्शनाची परवानगी देण्यात आली आहे. त्यामुळे अनेकांना दर्शन न घेताच माघारी फिरावे लागत असल्याने, ऑनलाईन बुकींगची संख्या वाढवावी अशी मागणी भाविकांनी केली आहे. अनेकांनी बाहेरूनच विठ्ठलाचे दर्शन घेतले.

गर्दी वाढल्याने व्यापाऱ्यांना दिलासा

आठ महिन्यांपासून विठ्ठल मंदिर बंद असल्यामुळे, मंदिरावर अवलंबून असलेल्या व्यापाऱ्यांची आर्थिक परिस्थिती बिकट झाली होती. मात्र 16 नोव्हेंबरपासून मंदिर खुले झाल्यामुळे पंढरपुरात भाविकांची संख्याही वाढू लागली आहे. यामुळे आधी मोक्षदा एकादशी आणि आता नवीन वर्षाच्या निमित्ताने भाविकांनी पंढरीत गर्दी केली आहे. त्यात अनेक भाविकांनी प्रसाद म्हणून पेढे, चिरमुरे, बत्ताशे, हळदी कुंकू, बुक्का खरेदी केला. तसेच घरातील बाळगोपाळांसाठी खेळण्यांची देखील खरेदी केली. विक्री वाढल्याने व्यापाऱ्यांना दिलासा मिळाला आहे.

विष्णूपद मंदिरात भाविकांची गर्दी

या महिन्यात पांडुरंग विष्णुपद मंदिरात मुक्कामी असतो, अशी आख्यायिका आहे. त्यामुळे मार्गशिर्ष महिन्यामध्ये भाविक विष्णुपद मंदिरात जाऊन दर्शन घेतात. यामुळे गोपाळपूर येथे स्थित विष्णुपद मंदिर भाविकांनी फुलून गेले आहे. भाविक या ठिकाणी येऊन गोपाळ काल्याचा आनंद घेताना दिसून येत आहे. तसेच नौकायान आणि वनभोजनचा देखील आनंद घेत आहेत.