सोलापूर: पाच मार्च रोजी एका बारावीच्या अल्पवयीन विद्यार्थीनीवर दोघा संशयित आरोपीनी अत्याचार केला होता. त्यानंतर 6 मार्च रोजी पीडित अल्पवयीन मुलीवर खुनी हल्ला करत, त्याचा जीवे मारण्याचा प्रयत्न केला होता. या प्रकरणी बार्शी शहर पोलीस स्टेशन व बार्शी ग्रामीण पोलीस ठाणे येथे अक्षय विनायक माने (वय 23 वर्ष), नामदेव सिद्धेश्वर दळवी (वय 24 वर्ष, दोघे रा, बाळेवाडी ता बार्शी, जि सोलापूर) या दोघांवर गुन्हा दाखल करून अटक केली आहे. पीडित मुलगी ही रक्तबंबाळ व जखमी अवस्थेत असल्याचे फोटो सोशल मीडियावर वायरल झाले होते. खासदार संजय राऊत यांनी पीडित मुलीचा रक्तबंबाळ अवस्थेत असलेला फोटो शनिवारी दुपारी ट्विट केला होता. यावरून पीडित मुलीची ओळख निर्माण झाल्या सारखे कृत्य केल्याप्रकरणी, बार्शी शहर पोलीस ठाण्यात खासदार संजय राऊत यांवर गुन्हा दाखल झाला आहे.
खासदार संजय राऊत अडचणीत: बार्शी तालुक्यात एका अल्पवयीन तरूणीवर बलात्कार करून त्यावर खुनी हल्ला करण्यात आला होता. या घटनेने सोलापूर जिल्ह्यासह महाराष्ट्र हादरला होता. गुन्हा दाखल झाल्यानंतर, कामात दिरंगाई केल्या प्रकरणी चार पोलीसांवर निलंबनाची कारवाई सुद्धा करण्यात आली आहे. शिवसेना खासदार राऊत यांनी शनिवारी दुपारी पीडित मुलीचा रक्तबंबाळ अवस्थेत असलेला फोटो ट्विट करत, संशयित आरोपी मोकाट आहेत. भाजप पुरस्कृत आहेत अशी माहिती प्रसारित केली होती. त्यामुळे पीडित अल्पवयीन मुलीची ओळख दाखवण्यासारखे कृत्य केल्यासारखे चित्र निर्माण झाले होते. अखेर बार्शी पोलीसांनी खासदार संजय राऊत यांवर भा.द.वि.जे.जे ऍक्ट 74,228-ए,नुसार गुन्हा दाखल झाला आहे. याबाबत पोलीस अधीक्षक शिरीष सरदेशपांडे यांनी फोन वरून माहिती देताना ही अधिकृत माहिती दिली.