सोलापूर- करमाळात मन हेलावून टाकणारी घटना समोर आली आहे. तालुक्यातील मलवडी येथे वडील आणि मुलाचा विहिरीत बुडून मृत्यू झाला आहे. ही घटना शनिवारी सकाळी ७ ते ८ वाजण्याच्या सुमारास घडली. या घटनेमुळे परिसरात शोककळा पसरली आहे.
ज्या विहिरीत बुडून सार्थक आणि त्याचे वडील शिवाजी कोंडलकर यांचा मृत्यू झाला, त्या विहिरीचे दृश्ये
मलवडीपासून दीड किलोमीटर अंतरावर कोंडलकर वस्ती आहे. सार्थक उर्फ सोन्या शिवाजी कोंडलकर (वय ११) हा सदर वस्तीसमोर २०० मीटर अंतरावर असलेल्या विहिरीत पोहायला गेला होता. विहिरीत पोहताना त्याच्या पाठीवर ड्रम बांधले होते. दरम्यान पोहताना सार्थक याच्या पाठीवरील प्लास्टिकच्या ड्रमची दोरी निसटली व तो पाण्यात बुडू लागला. हे पाहून त्याचे वडील शिवाजी यांनी पाण्यात उडी मारून सार्थकला पाण्याबाहेर काढण्याचा प्रयत्न केला. पण घाबरलेल्या सार्थकने वडिलांच्या गळ्याला मिठी मारली व त्यात ते दोघे विहिरीतील खोल पाण्यात बुडाले.