सोलापूर - मराठी मुलखातील सह्याद्रीच्या मावळ्यांनी अफलातून विश्वविक्रम केला आहे. '360 एक्सप्लोरर' या गटाने भारताच्या 73 व्या स्वातंत्र्यदिनी 73 फुटी तिरंगा युरोपमधील सर्वोच्च शिखर माउंट एलब्रुसच्या बेसकॅम्पवर फडकवला आहे. कोल्हापूर-सांगली येथील पूरग्रस्त लोकांना संकटातून सावरण्याची प्रेरणा देण्यासाठी खास कोल्हापुरी फेटा बांधून, या पथकाने तिरंग्याला अभिवादन केले.
'360 एक्सप्लोरर' या पथकाने छत्रपती शिवाजी महाराजांना अभिवादन करण्यासाठी रायगडावरील माती, छत्रपतींची प्रतिमा एलब्रुस शिखरावर नेली आहे. या गटाने 15 ऑगस्ट रोजी युरोपातील सर्वोच्च शिखरावर तिरंगा फडकवण्याची मोहीम हाती घेतली होती. यात 10 वर्षांचा साई कवडे हा एलब्रुस शिखर सर करणारा आशियातील सर्वात लहान मुलगा ठरला आहे. आज 15 ऑगस्ट रोजी अंतिम चढाईला निघण्यापूर्वी आनंद बनसोडे, साई कवडे, सागर नलावडे (कोल्हापूर), भूषण वेताळ (औरंगाबाद), तुषार पवार (सातारा) यांनी 73 फुटी तिरंगा एलब्रुस बेसकॅम्प (13000 फूट) वर फडकावला. विदेशात सर्वात लांब तिरंगा फडकवण्याचा विक्रम या गटाने प्रस्थापित केला आहे. गट प्रमुख आनंदने जुलै 2014 मध्ये हे शिखर सर केले होते. आता तो या टीमला मार्गदर्शक म्हणून पुन्हा मोहिमेवर गेला आहे.
