सोलापूर- कृषी उत्पन्न बाजार समितीमध्ये मागील ५ दिवसात तब्बल ७१ कोटी रुपयांची कांदा विक्री झाली आहे. कांदा विक्रीसाठी देशातील सर्वात मोठी बाजारपेठ म्हणून सोलापूरचे नाव लौकिक आहे. मागील पाच दिवसांपासून सोलापूर कृषी उत्पन्न बाजार समितीत चांगला भाव मिळत असल्यामुळे कांद्याची आवक वाढली. त्यामुळे ७१ कोटी पेक्षा जास्त रुपयांची आर्थिक उलाढाल झाली आहे.
सलग महिनाभर कोसळणाऱ्या पावसामुळे शेतकऱ्यांनी शेतात लावलेला कांदा सडला होता. मात्र, शेतकऱ्यांच्या उरल्यासुरल्या कांद्याला सोलापूरच्या कृषी उत्पन्न बाजार समितीत चांगला भाव मिळत आहे. त्यामुळे कृषी उत्पन्न बाजार समितीमध्ये १ लाख ६२ हजार ५०० क्विंटल कांद्याची विक्री झाली आहे. या विक्रीतून ७१ कोटी १२ लाख रुपयांची आर्थिक उलाढाल झाली आहे. तेच डिसेंबर २०१८ या महिन्यात सोलापूर कृषी उत्पन्न बाजार समितीमध्ये एकूण ८ लाख ५० हजार क्विंटल कांदा विक्री झाला होता. या विक्रीतून ४८ कोटी ३५ लाख रुपयांची आर्थिक उलाढाल झाली होते. मात्र, ते संपूर्ण डिसेंबर महिन्यात झालेल्या कांदा विक्रीतून मिळाले होते. मात्र, चालू वर्षी फक्त पाच दिवसातच कांदा विक्रीतून ७१ कोटी रुपयांची आर्थिक उलाढाल झाली आहे.