चिपी विमानतळाच्या शुभारंभाचा मुहूर्त टळला

बहुचर्चित चिपी विमानतळाच्या उद्धाटनाचा कार्यक्रम पुढे ढकलण्यात आला आहे. येत्या 23 जानेवारीला मुख्यमंत्री उद्धव ठाकरे यांच्या हस्ते या चिपी विमानतळाचे उद्धाटन करण्यात येणार होते.

सिंधुदुर्ग - जिल्ह्यातील बहुचर्चित चिपी विमानतळाच्या उद्धाटनाचा कार्यक्रम पुढे ढकलण्यात आला आहे. येत्या 23 जानेवारीला मुख्यमंत्री उद्धव ठाकरे यांच्या हस्ते या चिपी विमानतळाचे उद्धाटन करण्यात येणार होते. मात्र विमानसेवा सुरू करण्यासाठी आणखी काही वेळ लागेल, यामुळे उद्घाटन पुढे ढकलण्यात आला असल्याची माहिती मंत्री उदय सामंत यांच्यासह विनायक राऊत यांनी दिली.

मुख्यमंत्र्यांनी किंवा मी कोणतीही परवानगी दिली नाही
चिपी विमानतळ सुरू करण्यासाठी अजून काही कालावधी लागणार आहे. केंद्र सरकारने चिपी विमानतळ सुरू करण्यास कुठलीही आडकाठी केलेली नाही. मात्र 23 जानेवारीला विमानतळ सुरू करण्याची कोणतीही परवानगी मुख्यमंत्री किंवा पालकमंत्री म्हणून मी दिलेली नाही, अशी प्रतिक्रिया पालकमंत्री उदय सामंत यांनी दिली.

निमंत्रण पत्रिका अद्याप फायनल नाही

चिपी विमानतळाची जी निमंत्रण पत्रिका सर्व ठिकाणी दाखवली जाते. ती अद्याप फायनल झालेली नाही. यासाठी केंद्रीय हवाई उड्डाण मंत्री संपूर्ण सहकार्य करत आहेत. मात्र विमानसेवा सुरू करण्यासाठी ते पूर्ण सुरक्षित असलं पाहिजे. यासाठी थोडा आणखी वेळ जाईल, अशी माहिती पालकमंत्री उदय सामंत यांनी चिपी विमानतळ पाहणी दौऱ्यानंतर दिली.

उद्धव ठाकरे, नारायण राणे दिसणार होते एकाच व्यासपीठावर

शिवसेनाप्रमुख दिवंगत बाळासाहेब ठाकरे यांच्या जयंतीचे औचित्य साधून 23 जानेवारीला चिपी विमानतळाचे उद्घाटन केले जाणार, अशी माहिती समोर येत होती. या उद्घाटनाला मुख्यमंत्री उद्धव ठाकरे, उपमुख्यमंत्री अजित पवार, माजी केंद्रीय मंत्री सुरेश प्रभू आणि भाजपचे नेते तसेच माजी मुख्यमंत्री नारायण राणे यांची प्रमुख उपस्थिती असेल, असे कार्यक्रमाच्या पत्रिकेत लिहिण्यात आले होते.

संबंधित आय. आर. बी. कंपनीने याबाबतची माहिती दिली आहे. चिपी विमानतळाच्या उद्घाटनाच्या निमित्ताने मोठ्या कालावधीनंतर नारायण राणे आणि उद्धव ठाकरे हे एकाच व्यासपीठावर एकत्र दिसणार होते. त्यामुळे या कार्यक्रमाकडे सर्वांचे लक्ष लागले होते. मात्र हा कार्यक्रम अखेर रद्द करण्यात आला आहे.

हेही वाचा -सिरमचे ‘कोविशिल्ड’ व्हॅक्सिन सिंधुदुर्ग जिल्ह्यात दाखल, शनिवारी लसीकरण

हेही वाचा -सिंधुदुर्ग जिल्ह्यात ६६ ग्रामपंचायतींसाठी आतापर्यंत ५२ टक्के मतदान