सिंधुदुर्ग- मालवण तालुक्यातील वायंगणी भंडारवाडी येथील सुभाष पांडुरंग साटम यांच्या बंद घराच्या छतावर लोकांना दोन बिबट्यांचे दर्शन झाले. त्यामुळे, गावात एकच धांदल उडाली. गावात दिवसा बिबट्यांचा संचार वाढल्यामुळे वायंगणी ग्रामस्थांमध्ये भीतीचे वातावरण पसरले आहे.
सुभाष पांडुरंग साटम यांच्या घराच्या छतावर बसलेल्या बिबटाचे दृश्य
वायंगणी येथील मयुरेश पेडणेकर, रितेश लाड यांना साटम यांच्या घराच्या छतावर गुरगुरल्या सारखा आवाज आला. आवाज कोण काढत आहे, हे जाणून घेण्यासाठी वर पाहिले असता त्यांना टेरेसच्या कठड्यावर २ बिबटे बसलेले दिसून आले. बिबटे दिसताच पेडणेकर आणि लाड यांनी आरडाओरड करत वाडीतील ग्रामस्थांना याबाबत माहिती दिली. यानंतर बिबट्यांना बघण्यासाठी ग्रामस्थांनी गर्दी केली होती.