सिंधुदुर्ग - निलेश राणेंना पूर्ण विचार करूनच उमेदवारी दिलेली आहे. कुणीही माझ्यावर दबाव आणू शकत नाही. काहीही झाले तरी निवडणूक लढवणारच. उमेदवारी मागे घेणे माझा पिंड नसल्याचे नारायण राणे यांनी स्पष्ट केले.
नारायण राणे यांचा महाराष्ट्र स्वाभिमान पक्ष एनडीएचा घटक पक्ष आहे. तसेच राणे भाजपचे खासदार आहेत. असे असताना देखील नारायण राणे यांनी सिंधुदुर्ग-रत्नागिरी मधून पुत्र निलेश राणे यांची उमेदवारी जाहीर केली. त्यामुळे नारायण राणेंवर भाजपचा दबाव असल्याची चर्चा सुरू आहे. या संबंधी वृत्तदेखील एका दैनिकाने प्रसिद्ध केले होते. मात्र, राणेंनी या सर्व चर्चा खोट्या असल्याचे सांगितले. तसेच पूर्ण विचार करून निलेश राणेंना उमेदवारी दिल्याचे स्पष्ट केले आहे.
निलेश राणे हे महाराष्ट्र स्वाभिमान पक्षाच्या झेंड्यावर रत्नागिरी-सिंधुदुर्ग लोकसभा मतदार संघातून निवडणूक लढवत आहेत. हा मतदार संघ युतीच्या जागा वाटपात शिवसेनेला सोडण्यात आलेला आहे. येथून शिवसेनेचे विद्यमान खासदार विनायक राऊत हे युतीचे उमेदवार आहेत. त्यामुळे राणेंच्या स्वाभिमानने उमेदवार उतरवू नये. यासाठी भाजप नेतृत्वाकडून दबाव येत असल्याच्या चर्चा होत्या. मात्र, या सर्व चर्चा खोट्या असल्याचे राणे म्हणाले.