वेंगुर्ला रॉक आयलॅण्डवर अडकलेल्या दोन कर्मचाऱ्यांचे भारतीय तटरक्षक दलाने वाचवले प्राण

वेंगुर्ला येथे रॉक आयलॅण्ड लाईट हाऊसवर गेल्या तीन दिवसांपासून पाणी, जेवण, लाईटविना दोन कर्मचारी अडकून पडले होते. त्यांच्या जीवाला धोका असल्याचे भारतीय तटरक्षक दलाला कळवले होते. त्यानुसार भारतीय तटरक्षक दल गोवा विभाग हा मदतीला सरसावला. व त्यांनी गोव्यातील चेतक हेलिकॉप्टरने वास्कोच्या उत्तरेकडे 38 समुद्री मैलांवर असलेल्या वेंगुर्ला दीपगृह येथील दोन कर्मचाऱ्यांचे प्राण वाचवले.

सिंधुदुर्ग - लाईट हाऊस आणि लाईट शिप संचालनालयाच्या सिंधुदुर्ग जिल्ह्यातील वेंगुर्ला रॉक आयलॅण्डवर अडकून पडलेल्या दोन कर्मचाऱ्यांना भारतीय तटरक्षक दलाच्या गोवा विभागाकडून सुखरूपरित्या आज (बुधवारी) गोव्यात आणण्यात आले आहे. भयावह चक्रीवादळात हे कर्मचारी समुद्रात वेंगुर्ला रॉक आयलॅण्डवर अडकून पडले होते.

भारतीय तटरक्षक दलाच्या गोवा विभागाकडून मदतकार्य -

डायरेक्टरेट जनरल ऑफ लाईट हाऊस आणि लाईट शिपकडून मिळालेल्या माहितीनुसार, त्यांचे दोन कर्मचारी वेंगुर्ला येथे रॉक आयलॅण्ड लाईट हाऊसवर गेल्या तीन दिवसांपासून पाणी, जेवण, लाईटविना अडकून पडले होते. त्यांच्या जीवाला धोका असल्याचे भारतीय तटरक्षक दलाला कळवले होते. त्यानुसार भारतीय तटरक्षक दल गोवा विभाग हा मदतीला सरसावला. व त्यांनी गोव्यातील चेतक हेलिकॉप्टरने वास्कोच्या उत्तरेकडे 38 समुद्री मैलांवर असलेल्या वेंगुर्ला दीपगृह येथील दोन कर्मचाऱ्यांचे प्राण वाचवले. या थरारक शोर्याचा व्हिडिओ समोर आला आहे, तटरक्षक दलानं ट्विटकरून याचे व्हिडिओ शेअर केले आहेत.

दोरखंड सोडून हेलिकॉप्टरमध्ये घेण्यात आले कर्मचाऱ्यांना -

पंचवीस मिनिटात वेंगुर्ला लाईट हाऊसवर पोहोचताच या खडकाळ भागात हेलिकॉप्टर उतरणे सोयीस्कर नव्हते. त्यामुळे त्यांना दोरखंड सोडून हेलिकॉप्टरमध्ये घेण्यात आले. ‘तौक्ते’ चक्रीवादळाच्या तडाख्यात त्यांची भयावह स्थिती झाली होती. भारतीय तटरक्षक दलाने पावसाळी तसेच वादळी वाऱ्याचा सामना करत सकाळी त्यांना सुखरूपरित्या गोव्यात आणले. भारतीय तटरक्षक दल गोवा विभागाने तौक्ते वादळात केलेले दुसरे मदत कार्य आहे. तौक्ते वादळामुळे येथील विद्युत पुरवठा पूर्णपणे खंडित झाला होता. तसेच, या दीपगृहाचेही मोठे नुकसान झाले आहे.