सावंतवाडीत झाडाची फांदी वाहनांवर कोसळली; ४ महिन्याचे बाळ आणि महिला बचावली

सावंतवाडी कुटीर रुग्णालय परिसरात असलेल्या आंब्याच्या झाडाची फांदी इनोव्हा कार व रिक्षावर कोसळली. या दुर्घटनेत रिक्षाचालकासह ४ महिन्याचे बाळ व त्याची आई थोडक्यात बचावले.

सिंधुदुर्ग -सावंतवाडी कुटीर रुग्णालय परिसरात असलेल्या आंब्याच्या झाडाची फांदी इनोव्हा कार व रिक्षावर कोसळली. या दुर्घटनेत रिक्षाचालकासह ४ महिन्याचे बाळ व त्याची आई थोडक्यात बचावले आहेत.

मशिरा इक्बाल मिहिर व महानूर इक्बाल मिहिर अशी माय-लेकांची नावे आहेत. या घटनेत कार व रिक्षाचे मोठे नुकसान झाले आहे. सध्या कोकणात पावसाने विश्रांती घेतली आहे. मात्र, अधुन-मधून हलक्या सरी कोसळत आहेत. मागील काही दिवसात कोकणात झालेल्या मुसळधार पाऊस आणि वादळी वाऱ्यामुळे संबंधित झाड जीर्ण झाले होते. यामुळे ते तोडण्यात यावे, अशी मागणी नागरिकांकडून करण्यात आली होती. मात्र, संबंधित प्रशासकिय यंत्रणेने याकडे दुर्लक्ष केले. आज (शुक्रवार) अखेर झाडाची मोठी फांदी रस्त्यावर कोसळली. दरम्यान, सावंतवाडी नगरपालिका कर्मचाऱ्यांनी झाडाची तुटलेली फांदी बाजूला केली आहे.