सिंधुदुर्गमध्ये आतापर्यंत पाच खलाशांचा मृत्यू, अजूनही आजाराचे निदान नाही

देवगड बंदरातील बोटींवर आणखी एका खलाशाचा अज्ञात रोगाने ओरोस जिल्हा रुग्णालयात उपचार सुरू असताना मृत्यू झाला. देवगड मध्ये आतापर्यंत 4 खलाशांचा तर जिल्ह्यात एकूण 5 खलाशांचा मृत्यू झाला आहे. या आजाराचे अद्यापही निदान झालेले नाही. यामध्ये खलाशांच्या ढोपराच्याखाली पायांना सूज येऊन त्यांना उभे राहता येत नाही.

सिंधुदुर्ग - देवगड बंदरातील बोटींवर आणखी एका खलाशाचा अज्ञात रोगाने ओरोस जिल्हा रुग्णालयात उपचार सुरू असताना मृत्यू झाला. देवगड मध्ये आतापर्यंत 4 खलाशांचा तर जिल्ह्यात एकूण 5 खलाशांचा मृत्यू झाला आहे. या आजाराचे अद्यापही निदान झालेले नाही. धनंजय कृष्णप्रसाद गौडा (वय 24 रा. नेपाळ, सध्या रा. देवगड) असे मृत खलाशाचे नाव असून मच्छीमार व्यावसायिक बाबू हिरनाईक यांच्या बोटीवर तो काम काम करीत होता.

देवगड बंदरातील सुमारे 16 खलाशांना या अज्ञात रोगाची लागण झाली आहे. यामध्ये खलाशांच्या ढोपराच्याखाली पायांना सूज येऊन त्यांना उभे राहता येत नाही. आतापर्यंत देवगडमधील 4 तर मालवणमधील एका खलाशाचा या आजाराने मृत्यू झाला आहे. खलाशांचा एका अज्ञात आजाराने मृत्यू होत असताना आरोग्य विभागाला मात्र या रोगाचे निदान करता आलेले नाही. तसेच आरोग्य विभागाने सर्व्हे व्यतिरिक्त कोणतीही उपयायोजना केली नसल्याचे मच्छीमारांनी सांगितले.

आठ दिवसानंतर दुसऱ्या खलाशाचा या आजाराने मृत्यू झाला आहे. यापूर्वी 6 मे रोजी पल्लवी कांदळगावकर यांच्या बोटीवरील खलाशाचा मृत्यू झाला होता. तर, त्यापूर्वी द्वीजकांत कोयंडे यांच्या बोटीवरील दोन खलाशांचा मृत्यू झाला होता.