पाटणमधील महिंद धरणाच्या भिंतीजवळ भगदाड; सुरक्षेचा प्रश्न ऐरणीवर

ढेबेवाडी खोर्‍यात वांग नदीवर महिंद धरण आहे. या धरणाच्या भिंतीजवळ मोठे भगदाड पडले आहे. धरणातील पाणीसाठी कमी झाल्याने हे भगदाड निदर्शनास आले.

सातारा(कराड) - पाटण तालुक्यात ढेबेवाडी खोर्‍यात असलेल्या महिंद धरणाच्या भिंती जवळ मोठे भगदाड पडल्याने धरणाच्या सुरक्षेचा प्रश्न ऐरणीवर आला आहे. या भगदाडामुळे ये-जा करणार्‍या नागरिकांसह जनावरांच्या जीवालाही धोका निर्माण झाला आहे.

महिंद धरणातील पाणीसाठा सध्या कमी झालेला आहे. त्यामुळे हे भगदाड निदर्शनास आले. यामुळे या परिसरातून ये-जा करणारे पादचारी, जनावरे तसेच पोहायला जाणार्‍या तरूणांच्या जीवितास धोका निर्माण झाला आहे. पाय घसरून या भगदाडात पडल्यास दुर्घटना होऊ शकते. त्यामुळे पाटबंधारे विभागाने तातडीने सुरक्षेच्या उपाययोजना हाती घ्याव्यात, अशी मागणी महिंद परिसरातील नागरिकांनी केली आहे.

दोन वर्षांपूर्वी झाले होते मजबुतीकरण -

वांग नदीवरील महिंद धरणात गेल्या 21 वर्षापासून नियमित पाणी अडवण्यात येत आहे. 484 मीटर लांबीचे हे मातीचे धरण असून धरणाला 104 मीटरचा मुक्त पद्धतीचा सांडवा आहे. यापूर्वी सांडव्या लगतच्या भिंतीची पडझड झाल्याने धरणाला धोका निर्माण झाला होता. त्यामुळे दोन वर्षापूर्वी जॅकिटींगद्वारे सांडव्याचे मजबुतीकरण करण्यात आले आहे. सध्या लाभ क्षेत्रातील शेतकर्‍यांच्या मागणीनुसार धरणातून पाण्याची आवर्तने सुरू आहेत. त्यामुळे धरणातील पाणीसाठा कमी होऊन भिंतीलगतचा भाग उघडा पडत चालला आहे. पाणी कमी झाल्याने धरणाच्या भिंतीलगत पडलेले भगदाड निदर्शनास आले.