सोलापूर- आपल्या हटके स्टाईलमुळे साताऱ्याचे खासदार उदयनराजे भोसले नेहमीच चर्चेत असतात. राजांची ही स्टाईल आज सोलापूरकरांनाही पाहायला मिळाली. शहरातील दौरा आटोपून आल्यावर रेस्टहाऊसवर त्यांना भला मोठा हार घालण्यात आला. याठिकाणी युवकांनी राजेंना गराडा घातला. युवकांची गर्दी वाढल्याने रस्ता रिकामा करणे कठीण झाल्यावर राजांनी शक्कल लढवली अन् आपली अलिशान गाडी सोडून ते पोलीस गाडीतून शहरात रपेट करण्यासाठी रवाना झाले. त्यामुळे सर्वांना आश्चर्याचा धक्का बसला.
उदयनराजे सोलापूरात येणार याची खबर आधीच माध्यमांतून युवकात पोहोचली होती. महाराज सोलापूरात आल्यानंतर त्यांच्या स्वागतासाठी समर्थकांनी पुष्पगुच्छ, पुष्पहार आणले होते. तसेच एक नेता... एक बार... उदयन महाराज...बार बार अशा घोषणांचा आवाज घुमत होता. प्रत्येकजण महाराजांसोबत सेल्फी घेण्यासाठी धडपडत होता.
त्यांच्या चाहत्यांबद्दल त्यांना विचारल्यावर त्यांनी आपल्या नव्या पिढीचे ज्ञान मान्य करत आपण किती साधा फोन वापरतो ते आपल्या खास शैलीत सांगितले. तसेच स्मार्ट फोनमुळे उद्भवणाऱया नेकडाऊन कम्युनिटी आणि इतर समस्यांबाबत प्रबोधनाची अपेक्षा त्यांनी माध्यमांकडे व्यक्त केली.