कराड (सातारा) -चालकाचा ताबा सुटल्याने मिनी बसने ट्रॅक्टरला पाठीमागून धडक दिल्याची घटना आज सकाळी सातच्या सुमारास पुणे-बंगळुरू महामार्गावर मलकापूर (ता. कराड) येथील डी मार्टसमोर घडली. या अपघातात मिनी बसमधील तिघे जण जखमी झाले आहेत. त्यांना कृष्णा रूग्णालयात दाखल करण्यात आले आहे.
जोसेफ जोबीन, जोसेफ जोसवीन आणि जोसेफ बाबू (सर्व रा. कल्लापुरीमल, कर्नाटक), अशी जखमींची नावे आहेत. आकाश दादाराव भोसले (रा. समतापूर, ता. जि. बीड) हा ट्रॅक्टर घेऊन कोल्हापूर-पुणे लेनवरून कराडकडे निघाला होता. त्यावेळी पाठीमागून आलेल्या मिनी बसचा चालक नागराज एच. हनुमाप्पा याचा बसवरील ताबा सुटला आणि बसने ट्रॅक्टरला धडक दिली. या अपघातात मिनी बसमधील तिघेजण जखमी झाले. तसेच अपघातात बस आणि ट्रॅक्टरचे नुकसान झाले आहे.