Republic Day : कोयना धरणावर नेत्रदीपक तिरंगी रोषणाई, पहा अप्रतिम दृश्ये

७४ व्या प्रजासत्ताक दिनानिमित्त महाराष्ट्राची वरदायिनी कोयना धरणावर जलसंपदा विभागाकडून नेत्रदीपक तिरंगी रोषणाई करण्यात आली आहे. या रोषणाईने धरणाचे सौंदर्य खुलले आहे.

सातारा :साताऱ्यातील कोयना धरण हे महाराष्ट्रातील सर्वात मोठे धरण आहे. १०५.२५ टीएमसी पाणी साठवण क्षमता असलेल्या कोयना धरणाला महाराष्ट्राची वरदायिनी आणि उद्योगविश्वाचा कणा मानले जाते. जलसंपदा विभागाने ७४ व्या प्रजासत्ताक दिनानिमित्त धरणावर नेत्रदीपक तिरंगी रोषणाई केली आहे. यामुळे कोयना धरणाची भिंत तिरंग्यात उजळून निघाली आहे. सध्या कोयना धरणाचे सहा वक्र दरवाजे उघडण्यात आले असून नदीपात्रात पाण्याचा विसर्ग सुरू केला आहे. सांडव्यातून पडणाऱ्या पाण्यावर प्रजासत्ताक दिनी तिरंगी प्रकाशझोत टाकण्यात आला आहे. तिरंगी रोषणाईचा हा नेत्रदीपक नजारा डोळ्यांचे पारणे फेडत आहे. यंदा चांगला पाऊस झाल्याने धरणात समाधानकारक पाणीसाठा आहे.

स्वातंत्र्यदिनी सर्व धरणांवर होती रोषणाई :स्वातंत्र्याच्या अमृत महोत्सवानिमित्त १५ ऑगस्ट रोजी राज्यातील बहुतांश धरणांवर जलसंपदा विभागाने तिरंगी रोषणाई केली होती. त्यामुळे सर्व धरणे तिरंगी रोषणाईने उजळून निघाली होती. त्यानंतर आता प्रजासत्ताक दिनी कोयना धरण व्यवस्थापनाने प्रजासत्ताक दिनी तिरंगी प्रकाशझोत टाकून प्रजासत्ताक दिन साजरा केला आहे. तर सलग आलेल्या सुट्ट्यांमुळे कोयनानगर परिसर पर्यटकांनी फुलून गेला आहे. गुलाबी थंडी आणि धरणावरील दाट धुक्याची दुलई पर्यटकांच्या डोळ्याचे पारणे फेडत आहे. उंचावरील रिसॉर्टमधून कोयना धरण परिसराचा नजारा पर्यटकांना पाहता येतो. त्यामुळे सध्या कोयनेतील हॉटेल आणि रिसॉर्टचे बुकींग फुल्ल आहे.

महाराष्ट्राच्या चित्ररथाचं संचलन : गुरूवारी राजपथावर मोठ्या उत्साहात महाराष्ट्राच्या चित्ररथाचं संचलन पार पडले. यावर्षी साडेतीन शक्तिपीठ आणि नारी शक्तिवर आधारीत असा देखावा चित्ररथात करण्यात आला होता. देशभरात 74 वा प्रजासत्ताक दिन साजरा करण्यात आला. अनेक ठिकाणी विविध कार्यक्रमांचे आयोजन करण्यात आले होते. राज्यभरात प्रजासत्ताक दिनाचा उत्साह पाहायला मिळला. प्रजासत्ताक दिनानिमित्त दिल्ली, मुंबईतील इमारतींना तिरंगा रंगाची आकर्षक विद्युत रोषणाई केली होती.

विविध ठिकाणी ध्वजारोहण संपन्न : उपमुख्यमंत्री आणि नागपूरचे पालकमंत्री देवेंद्र फडणवीस यांच्या हस्ते नागपुरात ध्वजारोहण झाले. नागपूरच्या कस्तुरचंद पार्क मैदानावर ध्वज वंदन होणार झाले. या कार्यक्रमात सर्वच विभागाचे वरिष्ठ प्रशासकीय अधिकारी उपस्थित होते. तसेच प्रजासत्ताक दिनाच्या निमित्ताने नागपूर येथील राष्ट्रीय स्वयंसेवक संघाच्या मुख्यालयात गुरूवारी सकाळी 8 वाजता ध्वजारोहण पार पडले. संघाचे नागपूर महानगर सहसंघचालक श्रीधर गाडगे यांच्या हस्ते हे ध्वजारोहण करण्यात आले.