सातारा -ओझर्डे (ता. वाई) येथील जवान सोमनाथ अरविंद तांगडे (वय ३८) यांना सिक्कीम येथे कर्तव्य बजावताना वीरमरण आले आहे. त्यांच्या मृत्यूने ओझर्डे गावावर शोककळा पसरली आहे.
हिमवर्षावामुळे झाले जखमी
जवान तांगडे हे सिग्नल डिपार्टमेंटमध्ये हवालदार या पदावर कार्यरत होते. सिक्कीममधील कॉलिंग पाँग येथून दहा किलोमीटर दुर एका बर्फाच्या टेकडीवर कर्तव्यावर असताना दि.८ एप्रिलच्या रात्री बर्फाचा पाऊस झाला. त्यातच त्यांचा तंबू देखील उडून गेला, तंबू नसल्यामुळे तांगडे व त्यांचे साथीदार बर्फाच्या पावसामुळे जखमी झाले होते, ते रात्रभर थंडीत कुडकुडत होते. त्यानंतर तांगडे यांना चक्कर आल्याने, उपचारासाठी कॉलिंग पाँग येथील मिल्ट्री हॉस्पिटलमध्ये दाखल करण्यात आले होते. तेथे त्यांच्यावर शस्त्रक्रिया झाली, तेव्हापासून ते कोमात होते अखेर त्यांचा मृत्यू झाला आहे.