सातारा जिल्ह्यात 67 कोरोना रुग्ण वाढले; सातारा तालुक्यातील सर्वाधिक रुग्ण

सातारा जिल्ह्यात 67 कोरोनाबाधित वाढले आहेत. यामध्ये सातारा तालुक्यातील रुग्ण सर्वाधिक आहेत. जिल्ह्यातील एकूण कोरोनाबाधित रुग्णसंख्या 1500 च्या जवळ पोहोचली आहे.

सातारा- जिल्ह्यातील विविध रुग्णालये व कोरोना केअर सेंटर मध्ये उपचार घेत असलेल्या एकूण 67 नागरिकांचा कोरोना तपासणी अहवाल पॉझिटिव्ह आला आहे. यामध्ये सर्वाधिक 29 बाधित सातारा तालुक्यातील रहिवासी आहेत, अशी माहिती जिल्हा शल्य चिकित्सक डॉ. आमोद गडीकर यांनी दिली.

गेल्या तीन महिन्यात कोरोनाबाधितांची वाढती रुग्णसंख्या ही कराड तालुक्याची डोकेदुखी होती. आता सातारा तालुक्यातही रुग्णसंख्या वाढत आहे. गेल्या आठवडाभरापासून सातारा शहरासह तालुक्यात मोठ्या संख्येने बाधित आढळून येत आहेत.सातारा तालुक्यातील जिहे येथे बाधितांची संख्या वाढत आहे.

67 रुग्णांमध्ये सातारा, कराड, खटाव, खंडाळा, कोरेगाव, वाई व पाटण तालुक्यातील व्यक्तींचा समावेश आहे. या 67 जणांमध्ये निकट सहवासित 59, प्रवास करुन आलेले 4, सारीचे 4 रुग्ण आहेत. जिल्ह्यात विविध रुग्णालयात आणि कोरोना केअर सेंटरमध्ये उपचार घेत असलेल्या 27 नागरिकांना दहा दिवसांनतर कोरोनामुक्त झाल्यावर घरी सोडण्यात आले असल्याचे डाॅ. गडीकर यांनी स्पष्ट केले.

प्रवासी बसेसना जिल्हाबंदी

जिल्हाबंदी असल्यामुळे प्रवासी असलेल्या कोणत्याही बसेसना इतर जिल्ह्यातून कोणत्याही कारणासाठी सातारा जिल्ह्यामध्ये प्रवेश करण्यास मनाई करण्यात आली आहे. खाजगी बसेस मधून प्रवास करणाऱ्या कोणालाही जिल्हा प्रवेश पास दिला जाणार नसल्याचे जिल्हाधिका-यांनी दिलेल्या आदेशात म्हटले आहे.

सातारा जिल्ह्यातील कोरोनाबाधित रुग्णांची संख्या 1500 च्या जवळ पोहोचली आहे. जिल्ह्यात बुधवारपर्यंत 61 जणांचा कोरोनामुळे मृत्यू झाला आहे.