सातारा - शिवेंद्रराजेंच्या जाण्याने राष्ट्रवादीला फरक पडणार नाही. तसेच, राष्ट्रवादी सोडण्याचा निर्णय त्यांनी उदयनराजेंमुळे घेतला नव्हता, असे सांगत शरद पवार यांनी शिवेंद्रराजेंच्या जाण्यामुळे होत असलेल्या वादाला पूर्णविराम दिला. साताऱ्यात झालेल्या पत्रकार परिषदेत ते बोलत होते. साताऱ्याची जागा राष्ट्रवादी निश्चितच राखेल, असा विश्वास देखील त्यांनी यावेळी व्यक्त केला.
साताऱ्याची जागा निश्चित राखू, शिवेंद्रराजे गेल्यामुळे पक्षाला फरक पडणार नाही - शरद पवार
शरद पवार म्हणाले, राष्ट्रवादी साताऱ्याची जागा नक्की राखणार असून माझ्याकडे आत्ताच तीन अर्ज आले आहेत. पक्षात माझ्यासमवेत अनेक सदस्य आहेत. त्यामुळे राष्ट्रवादीला धोका नाही. शिवेंद्रसिंहराजे मला भेटले होते, त्यांचे काही स्थानिक प्रश्न होते. खासदारांसमवेत बैठक लावली जावी, अशी त्यांची इच्छा होती. मात्र, उदयनराजे दिल्लीत असल्याने ते झाले नाही, असे त्यांनी सांगितले.