सातारा - मद्यपी कारचालकाने पंढरपूरहून साताऱ्याकडे जाताना चांगलाच धुमाकूळ घातला. उपरी (जि.सोलापूर) पासून सुरू झालेली धडकण्याची मालिका गोंदवल्यातील सतर्क नागरिकांमुळे संपल्याने पुढील अनर्थ टळला. या थरारात मद्यपी चालक हणमंत गेजगे याने १३ जणांना धडक दिल्याची माहिती समोर येत आहे.
मद्यपी कारचालकाने पंढरपूरहून साताऱ्याकडे जाताना चांगलाच धुमाकूळ घातला मंगळवारी रात्री आठच्या सुमारास गोंदवले बुद्रुक (ता.माण) येथील मुख्य रस्ता सामसूम होत असतानाच अचानक मनसेचे जिल्हाध्यक्ष धैर्यशील पाटील यांच्याशी म्हसवडच्या शेखर वीरकर यांनी संपर्क साधून एक चारचाकी वाहन रस्त्याने वाहनांना धडक येत असल्याची माहिती दिली.
यानंतर काही मिनिटांतच संपूर्ण रस्ता रिकामा करण्यात आला. या मद्यपीचे वाहन थांबवण्यासाठी सातारा-पंढरपूर रस्त्यावर धैर्यशील पाटील यांनी स्वतःचा डंपर आडवा उभा केला.
काही मिनिटांतच (एमएच 11 सीजी 3660) ही पांढऱ्या रंगाची चारचाकी वेगाने येताना दिसली. रस्त्यावरच डंपर आडवा लावल्यामुळे मद्यपी चालकाला गाडी थांबवावी लागली. चालक गेजगे याने गाडी थांबवताच स्थानिकांनी गाडीभोवती गराडा घातला. याचवेळी पाटील यांनी चालकाला गाडी बंद करण्यास सांगितले. मात्र, तो ऐकण्याच्या मनस्थितीत नसल्याने अखेर काचा फोडून गाडी बंद करण्यात आली. यानंतर चालक हणमंत गेजगे यालाही गाडीतून बाहेर काढून लोकांनी चांगलाच चोप दिला.
त्याक्षणी या वाहनाचा पाठलाग करणारे पोलीस देखील घटनास्थळी पोहोचले व त्यांनी चालकाला ताब्यात घेतले. संबंधित वाहनाचा म्हसवडमधूनच बंटी माने नामक व्यक्ती व त्यांच्या सहकाऱ्यांनी देखील पाठलाग सुरू केला होता. मात्र, गोंदवल्यात हे वाहन थांबल्यानंतर त्यांचाही पाठलाग संपला.
दरम्यान, या वाहनाने विरकरवाडी(ता.माण)येथील दोघांना पिलीव घाट परिसरात उडवून गंभीर जखमी केल्याची प्राथमिक माहिती मिळाली आहे. म्हसवड पोलिसांनी अपघातग्रस्त वाहन व चालकला ताब्यात घेतले असून साहाय्यक पोलीस निरीक्षक गणेश वाघमोडे अधिक तपास करत आहेत. या पाठलागात म्हसवड पोलीस ठाण्याचे किरण चव्हाण, सुरज काकडे, संजय अस्वले, अनिल वाघमोडे सहभागी होते.
