नाटकांचा सांस्कृतिक वारसा जपण्यासाठी प्रत्येक तालुक्यात नाट्यगृह उभारणार, सांस्कृतिक मंत्री सुधीर मुनगंटीवारांची घोषणा

Theater In Every Taluka : राज्याचे सांस्कृतिक मंत्री सुधीर मुनगंटीवार यांनी प्रत्येक तालुक्यात नाट्यगृह उभारण्याची घोषणा केली आहे. यासह नाट्यगृहांची परिस्थिती सुधारण्यासाठी नगर विकास खात्यातून विशेष निधी देण्याचा प्रयत्न केला जाईल असंही ते म्हणाले.

सांगली Theater In Every Taluka : राज्यातील नाटकांचा सांस्कृतिक वारसा जपण्यासाठी प्रत्येक तालुक्यात नाट्यगृह उभारण्याचा राज्य सरकारचा संकल्प असल्याचं सांस्कृतिक मंत्री सुधीर मुनगंटीवार यांनी जाहीर केलं. यासह दुर्दशा झालेल्या नाट्यगृहांच्या सुधारणेसाठीही निधी उपलब्ध करण्यात येणार असल्याचं त्यांनी सांगितलं. ते सांगलीमध्ये १०० व्या अखिल भारतीय नाट्य मराठी संमेलनाच्या मुहुर्तमेढ सोहळ्याप्रसंगी बोलत होते.

शताब्दी मुहूर्तमेढ सोहळा : सांगलीमध्ये यंदाच्या १०० व्या नाट्य संमेलनाची मुहूर्तमेढ रोवली गेली. विष्णूदास भावे नाट्यगृह येथे मोठ्या दिमाखात शताब्दी मुहूर्तमेढ सोहळा पार पडला. यावेळी राज्याचे सांस्कृतिक मंत्री सुधीर मुनगंटीवार, संमेलनाचे मावळते अध्यक्ष प्रेमानंद गजवी, नियोजित अध्यक्ष जब्बार पटेल, पालकमंत्री सुरेश खाडे, खासदार संजय पाटील, अभिनेता आणि नाट्य परिषद अध्यक्ष प्रशांत दामले तसेच संमेलनाचे स्वागताध्यक्ष आमदार सुधीर गाडगीळ उपस्थित होते. यावेळी प्रशांत दामले यांच्या हस्ते तिसरी घंटा वाजवून कार्यक्रमाची सुरुवात झाली. मावळते अध्यक्ष प्रेमानंद गजवी यांच्या हस्ते संहिता पूजन पार पडलं.

प्रत्येक तालुक्यांमध्ये दोन नाट्यगृह उभारणार : यावेळी बोलताना सांस्कृतिक मंत्री सुधीर मुनगंटीवार म्हणाले की, महाराष्ट्राला नाट्य सांस्कृतिक वारसा असून तो जोपासण्याचं काम केलं पाहिजे. यासाठी राज्य सरकार प्रयत्नशील असून हा वारसा जपण्यासाठी राज्यातल्या ३६ जिल्ह्यातील प्रत्येक तालुक्यांमध्ये दोन नाट्यगृह उभारण्याचा संकल्प राज्य सरकारकडून करण्यात आल्याचं त्यांनी सांगितलं. त्याचबरोबर सौर ऊर्जेवर चालणारे नवे ७५ नाट्यगृह देखील उभारण्यात येणार असल्याचं ते म्हणाले.

नगर विकास खात्यातून विशेष निधी : "शिवराज्याभिषेक सोहळ्याला यंदा साडेतीनशे वर्षे पूर्ण होत आहेत. यानिमित्त प्रत्येक जिल्ह्यात 'जाणता राजा' हा नाट्यप्रयोग सादर केला जातोय. मात्र राज्यातील अनेक नाट्यगृह दुरावस्थेत आहेत. विशेषत: शहरी भागातील नाट्यगृहांची अवस्था वाईट आहे. त्यामुळे त्यांना पुन्हा उर्जित अवस्थेत आणण्यासाठी नगर विकास खात्यातून विशेष निधी देण्याचा प्रयत्न केला जाईल", असं सुधीर मुनगंटीवार यांनी नमूद केलं.

हे वाचलंत का :