सांगली - आटपाडी तालुक्यातील बाळेवाडी येथे एक दुर्दैवी घटना घडली आहे. नाल्याच्या बांधात बुडून १० वर्षीय सख्या जुळ्या भावंडांचा मृत्यू झाला आहे. दोघांनीही जन्मल्यानंतर एकाचवेळी पहिला श्वास घेतला होता. तसेच शेवटचा श्वास देखील एकाच वेळी घेतला. दरम्यान, या घटनेने परिसरात हळहळ व्यक्त होत आहे.
ईटीव्ही भारतला मिळालेल्या माहितीनुसार, लव कोळेकर आणि अंकुश कोळकर हे जुळे भाऊ मेंढ्या चारण्यासाठी बाळेवाडीच्या माळावर गेले होते. या माळावर जागोजागी माती नाला बांध आहेत. मागील आठवड्यात या परिसरात मोठा पाऊस झाला आहे. यामुळे सर्व बांध भरले आहे. मेंढ्या चरत आणि खेळत-खेळत तलावाच्या पाण्यात एक जण बुडाला. पाण्याचा अंदाज लागला नाही. पाय गाळात रुतत चालला. त्याला बाहेर काढण्यासाठी दुसरा गेला आणि बघता बघता दोघेही एकाच वेळी पाण्यात बुडाले.