सांगली - सांगली जिल्ह्यात आलेल्या पुराचा फटका मोठ्या प्रमाणावर लोकांना बसल्याने तत्काळ 10 हजार रूपयांची तात्पुरती मदत देण्याचा शासनाने निर्णय घेतला आहे. पंचनामे करून निकषाप्रमाणे नुकसान भरपाई देण्यात येईल, असे राज्याचे मदत व पुर्नवसन मंत्री व सांगलीचे पालकमंत्री सुभाष देशमुख यांनी सांगितले.
सुभाष देशमुख यांनी सांगली जिल्ह्यातील अंकलखोप व परिसरातील 8 ते 10 गावांचा दौरा केला. यामध्ये अंकलखोपसह दुधोंडी, दह्यारी, तुपारी, घोगाव, बुर्ली आणि नांद्रे या गावांना प्रत्यक्ष भेट देवून पाहणी केली व पूरबाधितांना दिलासा दिला. तसेच ब्रम्हनाळच्या पूरग्रस्तांची वसगडे येथे आणि नागठाणे, कसबे डिग्रज, दुधगावच्या पूरग्रस्तांची आष्टा येथे भेट घेवून परिस्थितीची माहिती घेतली. यावेळी त्यांनी पूरबाधितांना शासन, जिल्ह्यातील संपूर्ण जनता तुमच्या पाठीशी आहे, घाबरू नका, असा धीर दिला.
यावेळी पूरबाधितांनी मृतांच्या नातेवाईकांना 5 लाखांची मदत, पिकांचे मोठ्या प्रमाणावर नुकसान झाल्याने पीक कर्ज मिळावे, घरे मिळावीत, जनावरांसाठी नुकसान भरपाई मिळावी, अशा मागण्या केल्या. दौऱ्यादरम्यान, जिल्हा परिषद अध्यक्ष संग्रामसिंह देशमुख आणि जिल्हा परिषद सदस्य अश्विनी पाटील यांनी पूरक्षेत्राची माहिती दिली. दौऱ्यानंतर जिल्हाधिकारी कार्यालयात त्यांनी पत्रकारांना माहिती दिली. यावेळी आमदार सुधीर गाडगीळ, आमदार पृथ्वीराज देशमुख, जनरल ऑफिसर कमांडिंग नवीन कुमार, जिल्हाधिकारी अभिजीत चौधरी, मुख्य कार्यकारी अधिकारी अभिजीत राऊत, अप्पर जिल्हाधिकारी गोपीचंद कदम आदि उपस्थित होते.
अलमट्टी धरणातून सुमारे साडेचार लाख क्युसेक्स विसर्ग करण्यात येत असून महाराष्ट्राचे मुख्यमंत्री देवेंद्र फडणवीस व कर्नाटकचे मुख्यमंत्री बी. एस.येडियुरप्पा हे एकमेकांशी समन्वय ठेवून आहेत. शासन पूर्ण गांभीर्याने ही परिस्थिती हाताळण्यासाठी प्रयत्नशील आहे. सर्वांनी मिळून या संकटातून मार्ग काढूया. यासाठी सर्वांचे सहकार्य आहे. दानशूर व्यक्तींनी मदतीसाठी पुढे यावे, असे आवाहन देशमुख यांनी केले.
