सांगलीकरांना दिलासा.. कडक निर्बंधांमध्ये शिथिलता, सकाळी 7 ते 11 वाजेपर्यंत विक्रीची परवानगी

सांगली - जिल्ह्यात लागू असलेल्या कडक निर्बंधांमध्ये 1 जूनपासून शिथिलता देण्यात आली आहे. सकाळी 7 ते 11 पर्यंत आता अत्यावश्यक सेवेतील किराणा, फळ, मटण, खाद्य, दूध, बेकरी दुकाने आणि भाजी मंडईला विक्रीसाठी परवानगी देण्यात आली आहे.

सांगली - जिल्ह्यात लागू असलेल्या कडक निर्बंधांमध्ये 1 जूनपासून शिथिलता देण्यात आली आहे. सकाळी 7 ते 11 पर्यंत आता अत्यावश्यक सेवेतील किराणा, फळ, मटण, खाद्य, दूध, बेकरी दुकाने आणि भाजी मंडईला विक्रीसाठी परवानगी देण्यात आल्याचे जिल्हाधिकारी अभिजित चौधरी यांनी जाहीर केले आहे. तसेच ज्याठिकाणी नियमांचे उल्लंघन होईल त्याठिकाणी कडक कारवाई केली जाईल, असेही जिल्हाधिकारी चौधरी यांनी पत्रकार परिषदेत स्पष्ट केले आहे.

सांगलीकरांना मिळाला दिलासा..

कोरोनाच्या वाढत्या पार्श्वभूमीवर 5 एप्रिलपासून कडक निर्बंध सांगली जिल्ह्यात लागू होते. मात्र आता वाढता प्रादुर्भाव कमी होत आहे. सांगली जिल्ह्याचा सध्याचा पॉझिटिव्हिट दर हा कमी येत असून 16.75 टक्के इतका दर आहे. त्यामुळे राज्य शासनाच्या सुचनेनुसार कडक निर्बंधामध्ये शिथिलता देण्यात येत असल्याचा निर्णय सांगलीचे जिल्हाधिकारी अभिजित चौधरी यांनी घेतला आहे.

"या"मध्ये असणार शिथिलता -

1 जूनपासून जिल्ह्यातील अत्यावश्यक सेवेतील सर्व किराणा दुकाने, फळे आणि दूध, बेकरी, खाद्य आणि मटण/चिकन दुकाने 7 ते 11 सुरू राहणाऱ असल्याचे जिल्हाधिकारी चौधरी यांनी जाहीर केले आहे. तसेच शहरातील भाजी मंडई या ठिकाणी सुद्धा 7 ते 11 या वेळेत भाजी विक्री करण्यासाठी परवानगी देण्यात आली आहे, मात्र आठवडा बाजारांवर बंदी असणार असल्याचे चौधरी यांनी स्पष्ट केले आहे.

"यांना"घरपोच सुविधांची परवानगी..

त्याच बरोबर हॉटेल, रेस्टॉरंट, बार आणि वाईन शॉप याठिकाणी घरपोच सेवा देण्याची परवानगी देण्यात आली आहे. याशिवाय कृषी क्षेत्राशी संबंधित आस्थापनांना देण्यात आलेले परवानगी कायम आहे. तसेच मार्केट यार्ड व अन्य ठिकाणी माल भरणे आणि उतरवण्यासाठीही परवानगी देण्यात आली, असून त्याबाबत वेळेचे बंधन असणार नाही. तर त्याच्या व्यतिरिक्त अन्य आस्थापना व परवानगी असणारे आस्थापनांनी 11 च्या नंतर दुकाने उघडे ठेवल्यास व कोरोना नियम उल्लंघन झाल्यास कडक कारवाई करण्यात येईल, असा इशारा जिल्हाधिकारी अभिजित चौधरी यांनी दिला आहे.