जुन्या नोटांचा गोरखधंदा अजुनही सुरू, सांगलीत सापडल्या १ कोटींच्या नोटा

सातारच्या कराड येथील दीपक बाकले आणि सांगलीच्या वाळवा तालुक्यातील नरसिंहपूर येथील रमेश पाटील यांनी या नोटा दिल्याची माहिती समोर आली आहे. मात्र या नोटा कोणाच्या मालकीच्या आणि त्या बदलण्यासाठी कोणाकडे देण्यात येत होत्या ? असा प्रश्न पोलिसांसमोर निर्माण झाला आहे.

सांगली - सांगलीच्या इस्लामपूर मध्ये तब्बल १ कोटींच्या जुन्या नोटा सापडल्या आहेत. जुन्या नोटा बाद होऊन दोन वर्ष उलटून गेल्यानंतरही या नोटा सापडल्यामुळे आश्चर्य व्यक्त केले जात आहे. जुन्या नोटांचे पाळेमुळे खणून काढण्याचे आव्हान पोलिसांसमोर आहे. १ कोटींचे मूळ मालक आणि एजंटपर्यंत पोलीस पोहोचतील, असा विश्वास सांगली पोलिसांनी व्यक्त केला आहे.

सांगलीच्या इस्लामपूर मध्ये ३ दिवसांपूर्वी तब्बल १ कोटी रुपयांच्या जुन्या नोटा सापडल्या. नोटा बदलण्याची प्रक्रिया सुरू असताना पोलिसांनी छापा टाकून हा प्रकार उघडकीस आणला. पण १ कोटींच्या या हजार पाचशेच्या जुन्या नोटा पाहून पोलीस दलही चक्रावून गेले. अजूनही या नोटा एवढ्या मोठ्या प्रमाणात असून, चक्क त्यांचा बाजारही सुरू असल्याने यामागे मोठी साखळी असल्याचा संशय वाढला आहे. कारण नोटा घेऊन आलेल्या तीन जणांकडे केवळ बदलण्याची जवाबदारी होती.

सातारच्या कराड येथील दीपक बाकले आणि सांगलीच्या वाळवा तालुक्यातील नरसिंहपूर येथील रमेश पाटील यांनी या नोटा दिल्याची माहिती समोर आली आहे. मात्र या नोटा कोणाच्या मालकीच्या आणि त्या बदलण्यासाठी कोणाकडे देण्यात येत होत्या ? असा प्रश्न पोलिसांसमोर निर्माण झाला आहे. एक कोटींच्या बदल्यात २५ लाख मिळणार होते, अशी माहिती समोर आली आहे. यामुळे या जुन्या नोटा घेऊन, त्याचे पुढे काय असाही प्रश्न निर्माण झाला आहे.

इस्लामपूर पोलिसांनी या प्रकरणी गतीने तपास सुरू केला आहे. वाळवा तालुक्यातील एक बड्या हस्तीचे हे पैसे असल्याची चर्चा दबक्या आवाजात सुरू आहे. या मागील सुत्रधाराचा शोध लवकरच लागले, असा विश्वास पोलिसांनी व्यक्त केला आहे.