दगडाने डोके ठेचून तरुणाची हत्या, सांगलीतील घटना

सांगलीत एका तरुणाचे डोके दगडाने ठेचून त्याची हत्या करण्यात आल्याची खळबळजनक घटना समोर आली आहे. ही हत्या शहरातील काळी खण परिसरात झाली असून हत्येचे कारण अस्पष्ट आहे.

सांगली - शहरात एका तरुणाचा दगडाने ठेचून निर्घृण खून करण्यात आल्याची धक्कादायक घटना समोर आली आहे. प्रदीप राजू हंकारे (वय 24) असे मृत तरुणाचे नाव आहे. सांगली शहरातील काळी खण याठिकाणी ही खुणाची घटना घडली आहे.

मिरज शहरातील टाकळी रोडवर राहणाऱ्या प्रदीप राजू हंकारे या तरुणाचा सांगली शहारात खून झाल्याची घटना घडली आहे. काळी खण रस्त्यावर प्रदीप हंकारे याचा मृतदेह बुधवारी सकाळी आढळून आला. रस्त्यावरून जाणाऱ्या नागरिकांना रस्त्याच्या कडेला प्रदीप याचा मृतदेह आढळून आला. त्यांनतर विश्रामबाग पोलिसांनी घटनास्थळी धाव घेत पंचनामा केला. प्रदीपच्या डोक्यात दगड घालून ही निर्घृण हत्या केल्याचे समोर आले आहे.

घटनास्थळी काही अंतरावर 3 मोठी दगडं आढळून आली आहेत, तर प्रदीप यांची दुचाकी काही अंतरावर सापडली आहे. मंगळवारी सकाळी प्रदिप हा घरातून बाहेर पडला होता. मात्र रात्रीच्या सुमारास त्याची हत्या करण्यात आली. ही हत्या कोणत्या करणातून झाली आहे, हे अद्याप अस्पष्ट असून या घटनेची नोंद विश्रामबाग पोलीस ठाण्यात झाली असून अधिक तपास पोलीस करत आहेत. तर दिवाळीच्या तोंडावर शहरात घडलेल्या घटनेमुळे खळबळ उडाली आहे.