सांगली- इस्लामपूर येथील कोरोना बाधित कुटुंबाला दिल्लीतुन सोडण्यात आपला कसलाही संबंध नसून केवळ राजकीय हेतून मला व राष्ट्रवादी काँग्रेस पार्टीला बदनाम करण्याचा काहींचा प्रयत्न सुरू असल्याचा आरोप जलसंपदा मंत्री जयंत पाटील यांनी केला आहे.तसेच समाजात संभ्रम निर्माण करणाऱ्यां विरोधात आपण तक्रार दाखल करणार असल्याचेही मंत्री यांनी स्पष्ट केले आहे. ते सांगलीमध्ये बोलत होते.
सांगलीच्या इस्लामपूर येथील एकाच कुटुंबातील 25 जणांना कोरोना लागण झाली आहे. त्यामुळे संपूर्ण राज्य हादरून गेले आहे. इस्लामपूर शहरातील त्या कुटुंबातील चौघेजण उमराह देवदर्शनासाठी सौदी अरेबियाला गेले होते. त्यानंतर ते 12 मार्च रोजी दिल्लीमध्ये दाखल झाले होते. त्यानंतर ते 14 मार्चला इस्लामपूर मध्ये परतले होते. मात्र, 14 ला त्यांच्यावर क्वारंनटाईनचे शिक्के मारलेले असताना देखील जलसंपदा मंत्री जयंत पाटील यांनी फोन केल्याने तेथील पोलिसांनी त्यांना सोडून दिल्याचा आरोप व्होक लिबरल या ट्विटर हँडलवरून करण्यात आला होता, त्यामुळे सोशल मीडियामधून याबाबत जयंत पाटील यांच्यावर जोरदार टीका झाली होती.