जत महसूल विभागाची वाळू तस्करीविरोधात छापेमारी; ट्रॅक्टर जप्त

जतच्या पूर्व भागात महसूल विभाग व पोलिसांच्या दुर्लक्षाने बोर नदीपात्रात वाळू तस्कर मोठ्या प्रमाणात सुरु आहे. तालुक्यातील करजगी, भिवर्गी येथे संख महसूल विभागाच्या पथकाने धाडी टाकून वाळू ट्रॅक्टर पकडला.

जत (सांगली) - तालुक्यातील करजगी, भिवर्गी येथे संख महसूल विभागाच्या पथकाने धाडी टाकून वाळू ट्रॅक्टर पकडला आहे. वाळू ट्रॅक्टर जप्त करुन संख अप्पर तहसीलदार कार्यालयाच्या आवारात लावण्यात आला आहे. तर भिवर्गी येथे वाळूचा ट्रॅक्टर चालकाने पथकाची माहिती मिळाल्याने पळ काढला. ही कारवाई शनिवारी पहाटे 5 वाजण्याच्या सुमारास करण्यात आली.

पूर्व भागात महसूल विभाग व पोलिसांच्या दुर्लक्षाने बोर नदीपात्रात वाळू तस्कर मोठ्या प्रमाणात सुरु आहे. भिवर्गी, बालगाव, हळ्ळी, करजगी, सुसलाद, सोनलगी, बेळोंडगी, संख ही गावे वाळू तस्करीचे प्रमुख केंद्र आहेत. संखचे अप्पर तहसिलदार हणमंत मेत्रे यांच्या नेतृत्वाखालील महसूल विभागाच्या पथकाने शनिवारी पहाटे ३ वाजता नदी पात्रातील करजगी, भिवर्गी, सुसलाद, सोनलगी येथे धाडी टाकल्या.

करजगी येथे वाळूने भरलेला कर्नाटक पासिंगचा ट्रॅक्टर (के.ए २८.टी ७१४९) आढळून आला. महसूल विभागाच्या पथकाने ट्रॅक्टरसह वाळू जप्त करुन अप्पर तहसिलदार कार्यालयासमोर लावला आहे. भिवर्गी येथील वाळू तस्करांना पथक आल्याची माहिती मिळताच ट्रॅक्टर पथकाच्या हातावर तुरी देत पलायन केले आहे.

दिपावलीची सुट्टी आहे. कार्यालय सुरु झाल्यावर ट्रॅक्टर मालकाचा शोध घेऊन नोटीस दिली जाणार आहे. त्याच्यावर गौण खनिज उत्खनन कायद्यानुसार दंड आकारणी केली जाणार आहे. तसेच यापुढेही वाळू तस्करीविरोधात कडक मोहीम राबविली जाणार आहे, अशी माहिती अप्पर तहसीलदार हणमंत म्हेत्रे यांनी दिली आहे.