बर्ड फ्लूची सांगलीत एन्ट्री?, मळणगावात अज्ञात रोगाने कोंबड्यांचा मृत्यू

कवठेमहांकाळ तालुक्यातील मळणगावामध्ये अज्ञात आजाराने कोंबड्या मृत्युमुखी पडल्याची घटना समोर आली आहे. दरम्यान पशुसंवर्धन विभागाने मृत कोंबड्या तपासणीसाठी पाठवले आहेत.

सांगली - जिल्ह्यातील कवठेमहांकाळ तालुक्यातील मळणगावामध्ये अज्ञात आजाराने कोंबड्या मृत्युमुखी पडल्याची घटना समोर आली आहे. दरम्यान पशुसंवर्धन विभागाने मृत कोंबड्या तपासणीसाठी पाठवले आहेत. तर या घटनेमुळे मळणगावात भीतीचे वातावरण पसरले आहे.

बर्ड फ्ल्युची धास्ती आणि अज्ञात रोगाने कोंबड्यांचा मृत्यू
राज्यात सद्या बर्ड फ्ल्यूच्या धास्ती आहे. सांगली जिल्ह्यात अद्याप बर्ड फ्लूची प्रादुर्भाव झाला नाही. मात्र कवठेमहांकाळ तालुक्यातील मळणगाव येथील एका पोल्ट्री शेडवरील 40 ते 50 कोंबड्या अज्ञात रोगाने मृत्यूमुखी पडल्याची घटना समोर आली आहे. दरम्यान या घटनेची बातमी वार्‍यासारखी पसरली असून बर्ड फ्लूच्या धास्तीने ग्रामस्थांमध्ये भीतीचे वातावरण पसरले आहे.

मृत कोंबड्या रस्त्याकडेला फेकल्या

तर संबंधित पोल्ट्री मालकाने याची माहिती पशूसंवर्धन विभागाला देण्याऐवजी सर्वच मृत कोंबड्या ट्रॅक्टरच्या ट्रॉलीमध्ये भरून जवळच असलेल्या जुन्या वज्रचौंडे बंधार्‍या लगतच्या परिसरात उघड्यावर फेकल्या होत्या. त्यानंतर काही वेळात परिसरातील भटक्या कुत्र्यांनी मृत कोंबड्यांचा फडशा पाडायला सुरुवात केली. पोल्ट्री शेडपासून कोंबड्या फेकून दिलेल्या ठिकाणापर्यंतच्या रस्त्यावर तोंडात कोंबड्या घेऊन फिरणारी कुत्री दिसत होती. तसेच रस्त्यावरही मृत कोंबड्या दिसत होत्या.

तापमानातील चढ-उतार यामुळे मृत्यू?

दरम्यान पोल्ट्री शेडचे मालक असणारे अशोक चव्हाण म्हणाले, 'गेल्या दोन दिवसात तापमानातील चढ-उतार यामुळे कोंबड्यांचा मृत्यू झाला आहे. त्यावेळी प्रकृती ठीक नसल्यामुळे आपण शेडवर जाऊ शकलो नाही आणि आपल्या मुलांनी त्या मृत पावलेल्या कोंबड्या सार्वजनिक ठिकाणी फेकून दिल्या होत्या. पण याची माहिती मिळाल्यानंतर आपण त्या कोंबड्यांची शास्त्रोक्त पद्धतीने विल्हेवाट लावली आहे. त्यानंतर पशुसंवर्धन विभागाच्या अधिकाऱ्यांनीही याठिकाणी पोल्ट्री शेडची पाहणी केली आहे.'

कोंबड्या तपासणीसाठी आल्या पाठवण्यात

या घटनेची माहिती पशूसंवर्धन विभागाला मिळाल्यानंतर घटनास्थळी पशुसंवर्धन पथकाने दाखल होऊन, त्या मृत कोंबड्यांची पाहणी केली. त्याच बरोबर कोंबड्यांचा मृत्यू कशामुळे झाला आहे हे पाहण्यासाठी काही मृत कोंबड्या तपासणीसाठी पाठवण्यात आल्याचे पशुसंवर्धन विभागाकडून सांगण्यात आले.

हेही वाचा -क्रिकेटच्या मैदानात नियतीने हरवले मात्र, निवडणुकीच्या रिंगणात जनतेने जिंकवले

हेही वाचा -सांगली जिल्ह्यात ग्रामपंचायत निवडणूकीत महाविकास आघाडीची सरशी