जत (सांगली) -जत पोलिसांनी तालुक्यातील सिंदूर या ठिकाणी एका शेतात छापा टाकून गांजा शेती उद्ध्वस्त केली आहे. यावेळी सुमारे 51 लाख 93 हजार 300 रुपये किंमतीची 520 किलो गांजाची झाडे जप्त करण्यात आली आहेत. ही कारवाई आज (दि. 2 नोव्हेंबर) करण्यात आली आहे.
सांगली जिल्ह्यातील जत तालुक्यातील सिंदूर या ठिकाणी गांजाची शेती करण्यात आल्याची माहिती जत पोलिसांना मिळाली होती. माहितीनुसार पोलिसांनी सिंदूर या ठिकाणी बसप्पा कुसबा अक्कीवाड यांच्या शेतामध्ये छापा टाकला. यावेळी या शेतामध्ये हळदीच्या शेतीआड गांजाची शेती करण्यात आल्याचे आढळून आले. त्यानंतर पोलिसांनी या शेतातील सर्व गांजाची झाडे उखडून टाकत जप्त केली आहेत. सुमारे 520 किलो हे गांजाची झाडे असून त्यांची किंमत सुमारे 51 लाख 93 हजार 300 रुपये इतकी आहे.