Uddhav Thackeray On CM : ढेकणं चिरडायला गोळीबाराची गरज नाही, तुमचे एक बोट मतदानाच्या दिवशी यांना संपवेल - उद्धव ठाकरे

ढेकणं चिरडायला गोळीबाराची गरज नाही, तुमचे एक बोट मतदानाच्या दिवशी यांना संपवेल असा घाणाघात उद्धव ठाकरे यांनी आज मुख्यमंत्री एकनाथ शिंदे यांच्यावर केला. ते आज रत्नागिरीतील खेडमधील गोळीबार मैदानात आयोजीत शिवगर्जना सभेत बोलत होते. मी घरात बसून महाराष्ट्र सांभाळला, तुम्ही दिल्लीसमोर मुजरे करत अशी टीका त्यांनी शिंदेवर केली. यांच्या व्यासपीठावर साधू दिसायचे आता संधीसाधू दिसतात असा प्रहार त्यांनी भाजप सरकारवर केला.

रत्नागिरी :शिवसेना ठाकरे गटाचे प्रमुख उद्धव ठाकरे यांची आज खेडमधील गोळीबार मैदान येथे शिवगर्जना सभा झाली. यावेळी त्यांनी भाजप आणि मुख्यमंत्री एकनाथ शिंदे यांच्यासह निवडणूक आयोगावर जोरदार टीका केली. यावेळी उद्धव ठाकरे म्हणाले की, निवडणुक आयोगाचा निर्णय आम्हाला मान्य नाही. मैदानाचे नाव चांगलय गोळीबार मैदान. ही ढेकणं चिरडायला गोळीबाराची गरज नाही. तुमचे एक बोट मतदानाच्या दिवशी यांना संपवेल. ज्यांना कुटुंबीय मानले, त्यांनीच आपल्यावर वार केले, असा घणाघात उद्धव ठाकरे यांनी यावेळी केला.

शिंदेंनी केले दिल्लीत मुजरे : यावेळी शिंदे गटावर टीका करताना उद्धव ठाकरे म्हणाले की, आपण अंधेरी जिंकलो. नाव चिन्ह नघेऊनही आपण जिंकलो. यांच्यात अनेक असे ज्यांनी बाळासाहेबांना बघितले पण नाही, ते आम्हाला बाळासाहेबांचे विचार सांगतात. बाळासाहेबांचे विचार नौकरी, उद्योग बाहेर जाऊ देणे हे बाळासाहेबांचे विचार नव्हते, असे म्हणत उद्धव ठाकरे यांनी शिंदे यांच्यावर टीका केली. मी घरात बसून पण महाराष्ट्र सांभाळला तुम्ही दिल्ली समोर मुजरे करत बसलात. माझ्या सोबत महाराष्ट्र होता. आपल जागतिक कौतुक झाले, ते माझे नाही महाराष्ट्राचे कौतुक होते. गुजरातच्या निवडणुका म्हणून महाराष्ट्रातले उद्योग तिकडे पाठवले.

देशद्रोही कसे म्हणता? :तुटलेल्या एसटीवर गतिमान महाराष्ट्राची जाहीरात करतात. सुविधा नाहीत याची यांना शरम वाटत नाही. महाराष्ट्र हे माझे कुटुंब, म्हणूनच माझे कुटुंब माझी जबाबदारी आहेच. ज्या गतीने तुम्ही कुटुंब बदलले तो गतिमान महाराष्ट्र नकोय, असे उद्धव ठाकरे यावेळी म्हणाले. तसेच उद्धव ठाकरे म्हणाले की, राजन साळवींचा छळ सुरु आहे, ते देशद्रोही नाहीत. राजन, वैभवची काय संपत्ती आहे? यांच्या मागे का लागता. तसेच देशद्रोही कसे म्हणता? मग सारवासारव करतात. १९९२-९३ साली मुंबई वाचवणारे यांना देशद्रोही वाटतायत, अशी टीका उद्धव ठाकरे यांनी यावेळी केली.

भाजपने संगमांचे काय चाटले? :दिल्लीचे मुख्यमंत्री अरविंद केजरीवाल यांच्या भेटीचा उल्लेखही उद्धव ठाकरे यांनी यावेळी केला. तसेच पंतप्रधानांना लिहिलेल्या लोकांचे प्रश्न विचारल्याचे उद्धव ठाकरे यांनी यावेळी सांगितले. तसेच विरोधातील तुमच्या पक्षात घेतले की, ते स्वच्छ होतात. विरोधी पक्षात असले की गुन्हेगार. पूर्वी यांच्या व्यासपीठावर साधू दिसायचे आता संधीसाधू दिसतात, अशी टीका उद्धव ठाकरे यांनी यावेळी भाजपवर केली. मेघालयात शहांनी संगमांवर जोरदार आरोप केले. निकालात संगमांनी यांना चित केले. घराणेशाहीचे, भ्रष्टाचाराचे आरोप केले .आज त्यांच्या सोबत सत्ता स्थापन करताहेत. मग आता भाजपने संगमांचे काय चाटले? असं म्हणत उद्धव ठाकरे यांनी केंद्रीय गृहमंत्री अमित शहा यांच्यावर टीका केली.

छत्रपतींचा भगवा फडकवायचा :त्यांना भगवे तेज संपवायचे आहे. मी हवा की, नको हे जनता ठरवेल, निवडणुक आयोग नाही. चोरांना आशीर्वाद देणार का? मिंधेच्या हातात धनुष्यबाण, पण मिंधेचा चेहरा पडलेला. मेरा खानदान चोर है, हे कधीच पुसले जाणार नाही, अशी टीका उद्धव ठाकरे यांनी मुख्यमंत्री एकनाथ शिंदे यांच्यावर यावेळी केली. मी हवा की, नको हे तुम्ही ठरवणार निवडणुक आयोग नाही. २०२४ स्वातंत्र्य लढ्याशी संबंध नसलेला पक्ष गाडून टाकायचा आहे, हा निश्चय करा. नाहीतर २०२४ नंतर आपल्या देशात लोकशाही शिल्लक राहणार नाही. उद्या शिमगा माझ्या सभेनंतर काही शिमगा करतील. संपूर्ण हिंदुस्थानात छत्रपतींचा भगवा आपल्या फडकवायचा आहे, असेही उद्धव ठाकरे यावेळी म्हणाले.

हेही वाचा -Sharad Pawar on Elections : 'काँग्रेस, राष्ट्रवादी, ठाकरे गट, डाव्या पक्षांनी एकत्रित निवडणुकीला सामोरे जावे'