रत्नागिरी- मुंबई-गोवा महामार्गावरील चिपळूण शहरातील वाशिष्ठी नदीवरील पूल आणि संगमेश्वर येथील शास्त्री पुलाच्या सुरक्षिततेसाठी स्ट्रक्चरल ऑडिट करण्यात येणार आहे. उद्यापासून (१० सप्टेंबर) १२ सप्टेंबरपर्यंत हे स्ट्रक्चरल ऑडिट करण्यात येणार आहे. त्यामुळे या दिवशी दुपारी १२ ते ४ या वेळेत पुलावरील वाहतूक तात्पुरत्या स्वरुपात बंद केली जाईल, असे आदेश जिल्हाधिकारी यांनी काढले आहेत. वाहतुकीसाठी पर्यायही यामध्ये सुचविले आहेत.
मुंबई-गोवा राष्ट्रीय महामार्गावरील ब्रिटिशकालीन पुलांच्या करण्यात आलेल्या सर्व्हेक्षणात चिपळूणमधील वाशिष्ठी आणि संगमेश्वरमधील शास्त्री पूल सद्यास्थितीत अतिधोकादायक असल्याचा अहवाल आला होता. त्यानंतर आता पुणे येथील स्टक्ट सोर्स इंजिनिअरींगच्या माध्यमातून या दोन्ही पुलांचे स्पेशल स्ट्रक्चरल ऑडिट केले जात आहे. त्यासाठी काही दिवसांपूर्वी पुलांची हॅमर टेस्ट करण्यात आली होती. उद्यापासून स्ट्रक्चरल ऑडिट करण्यात येणार आहे. या दोन्ही पुलांवरून दिवसभर वाहतूक सुरू असते. त्यामुळे, तपासणी करताना वाहतूक बंद ठेवणे आवश्यक आहे. त्यासाठी जिल्हा प्रशासनाकडून आदेश काढण्यात आले आहेत.