रत्नागिरी शहरातील सेक्स रॅकेटचा पर्दाफाश; एका महिलेसह दोघांना अटक

शहरातील ओसवालनगर येथे एका बंगल्यात चालणाऱ्या सेक्स रॅकेटचा स्थानिक गुन्हे अन्वेषण शाखेच्या पोलिसांनी पर्दाफाश केला आहे. या प्रकरणी पोलिसांनी एका महिलेसह दोघांना अटक केली आहे.

रत्नागिरी -रत्नागिरी शहरातील ओसवालनगर येथे एका बंगल्यात चालणाऱ्या सेक्स रॅकेटचा स्थानिक गुन्हे अन्वेषण शाखेच्या पोलिसांनी पर्दाफाश केला आहे. पोलिसांनी केलेल्या कारवाईत एक पीडित युवती सापडली असून सेक्स रॅकेट चालवणाऱ्या दोघांना पोलिसांनी ताब्यात घेतले आहे.

पोलिसांना मिळाली होती गुप्त माहिती -

ओसवालनगर येथील एका बंगल्यात सेक्स रॅकेट सुरू असल्याची माहिती स्थानिक गुन्हे अन्वेषण शाखेच्या पोलिसांना मिळाली होती. जिल्ह्याबाहेरील तरुणी आणून या ठिकाणी अनैतिक व्यवसाय सुरू होता. दरम्यान मिळालेल्या माहितीनुसार स्थानिक गुन्हे अन्वेषण शाखेच्या पोलिसांनी सापळा रचला. स्थानिक गुन्हे शाखेचे पोलीस निरिक्षक हेमंतकुमार शहा यांच्या कुशल मार्गदर्शनाखाली टिमने एका बनावट ग्राहकामार्फत यातील एका व्यक्तीशी संपर्क साधला होता. बनावट गिहाईक तयार करून भेटीची वेळ ठरवण्यात आली. गुरुवारी दुपारी ओसवाल नगर परिसरात सापळा लावण्यात आला. बनावट ग्राहक बनून आत गेल्यानंतर पोलीसांच्या पथकाने बंगल्यावर धाड टाकली.

दोघांना घेतले ताब्यात -

यावेळी एका तरुणीसह तीच्याकडून अनैतिक व्यवसाय करवून घेणाऱ्या टोळीतील पद्मीनबाई तुकाराम बादलवाड (४३) रा. सोलापूर, शिवाजी आनंदराव पाटील (५८) रा. सातारा या दोघांना पोलीसांनी ताब्यात घेतले आहे. तर तरुणीला महिला सुधारगृहात पाठविण्यात आहे. या तरुणीला आणण्यासाठी वापरलेली चारचाकी गाडी जप्त करण्यात आली आहे. तसेच ओसवालनगर येथील तो बंगला पोलीसांनी सील केला आहे. दरम्यान स्थानिक गुन्हे शाखेच्या कर्मचाऱ्यांच्या तक्रारीवरुन दोघांविरुद्ध गुन्हा दाखल करण्याचे काम रात्री उशिरापर्यंत सुरु होते. या प्रकरणात या दोघांशिवाय टोळीत अन्य कितीजण आहेत. या दोघांच्या संपर्कात रत्नागिरीतील अन्य कोण कोण आले आहे, याचा पोलीस तपास करत आहेत.