रत्नागिरी - येथील कोविड रुग्णालयात एक धक्कादायक प्रकार समोर आला आहे. एका कोरोनाबाधिताच्या नातेवाईकांनी चक्क त्याचा मृतदेह जबरदस्तीने उचलून नेला. इतकेच नव्हे तर वैद्यकीय अधिकाऱ्यांचा विरोध न जुमानता त्यांनी या नातेवाईकांनी त्या मृतदेहावर अंत्यसंस्कारही केले. ही घटना रविवारी रात्री घडली.
शहरातील राजीवडा येथील एका कोरोना पॉझिटिव्ह रुग्णावर जिल्हा शासकीय रुग्णालय म्हणजेच कोविड रुग्णालयात उपचार सुरू होते. मात्र, उपचारादरम्यान अतिदक्षता विभागात या रुग्णाचा मृत्यू झाला. ही माहिती नातेवाईकांना समजताच त्यांनी गैरसमजातून अतिदक्षाता विभागात जावून या पॉझिटिव्ह रूग्णाचा मृतदेह ताब्यात घेतला. यावेळी पारिचारिका आणि वैद्यकीय अधिकाऱ्यांनी याला विरोध केला. मात्र, या 25 ते 30 जणांच्या समूहाने या विरोधाला जुमानले नाही. उलट या कर्मचाऱ्यांशीच हुज्जत घातली आणि मृतदेह घेऊन गेले.