रत्नागिरी नगर परिषद नगराध्यक्ष पोटनिवडणूक; ५८ हजार मतदार बजावणार मतदानाचा हक्क

राहुल पंडित यांच्या राजीनाम्यानंतर रत्नागिरी नगर परिषदेची पोटनिवडणूक जाहीर झाली. ही निवडणूक एकतर्फी होईल, असे वाटत असतानाच सर्वच राजकीय पक्षांनी निवडणूक प्रतिष्ठेची केल्याने प्रचाराची धुळवड चांगलीच उडाली. गेला महिनाभर शहरात निवडणुकीचा ज्वर पहायला मिळाला.

रत्नागिरी - रत्नागिरी नगर परिषदेच्या नगराध्यक्ष पदाच्या पोटनिवडणुकीसाठी रविवारी मतदान प्रक्रिया पार पडणार आहे. या चौरंगी लढतीत ४ उमेदवारांचे भवितव्य मतदान यंत्रात कैद होणार आहे. या निवडणूकीत ५८ हजार ७७० मतदार मतदानाचा हक्क बजावणार आहेत. त्यामध्ये ३० हजार २३ स्त्री मतदार तर २८ हजार ७४६ पुरुष मतदार आहेत. शहरात एकूण ४९ मतदान केंद्र आहेत. यात सुमारे ३०० कर्मचारी निवडणूक प्रक्रियेत सहभागी झाले आहेत.

राहुल पंडित यांच्या राजीनाम्यानंतर रत्नागिरी नगर परिषदेची पोटनिवडणूक जाहीर झाली. ही निवडणूक एकतर्फी होईल असे वाटत असतानाच सर्वच राजकीय पक्षांनी निवडणूक प्रतिष्ठेची केल्याने प्रचाराची धुळवड चांगलीच उडाली. गेल्या महिनाभर शहरात निवडणुकीचा ज्वर पहायला मिळाला. कुठे रोड शो, तर कुठे प्रभागवार बैठका तर काही ठिकाणी वैयक्तिक भेटी गाठी घेऊन प्रचार करण्यात आला. शिवसेना, भाजप, राष्ट्रवादी आणि मनसे हे 4 पक्ष निवडणुकीच्या रिंगणात आहेत. शिवसेनेचे प्रदीप उर्फ बंड्या साळवी, भाजपचे अ‌ॅड. दीपक पटवर्धन, राष्ट्रवादीचे मिलिंद कीर आणि मनसेचे रुपेश सावंत हे निवडणूक रिंगणात आहेत. या चौघांमध्ये ही लढत होणार आहे.

हेही वाचा -मुंबई-गोवा महामार्गावर वाहतूक कोंडी, पोलिसांची दमछाक

या सर्वांनी ही निवडणूक प्रतिष्ठेची केल्याने सार्‍यांच्या नजरा मतदानाकडे आहेत. निवडणूक प्रक्रिया शांततेत पार पडावी, यासाठी पोलीस दल सज्ज झाले आहे. शहरात चोख सुरक्षा व्यवस्था तैनात केली आहे. दिवसरात्र वाहनांची तपासणी सुरू आहे. ३० तारखेपर्यंत शहरात ही सुरक्षा व्यवस्था तैनात राहणार आहे. रविवारी होणार्‍या मतदान प्रक्रियेनंतर मतमोजणी ३० डिसेंबरला होणार आहे. सकाळी 9 वाजता मतमोजणीला सुरुवात होईल. नगर परिषद येथील संत गाडगेबाबा सभागृहात ही मतमोजणी होणार आहे. यासाठी प्रशासनाने योग्य ती खबरदारी घेतली आहे.