रत्नागिरी - रिफायनरीवरून राजापूरमध्ये पुन्हा एकदा वातावरण तापले आहे. त्यात आज शिवसेनेतील रिफायनरी समर्थकांनी शिवसेनेला झटका दिला आहे. रिफायनरी समर्थक शिवसेना कार्यकर्त्यांनी आज कोकणातील भाजपा नेते माजी आमदार प्रमोद जठार यांच्या उपस्थितीत भाजपामध्ये प्रवेश केला आहे. जवळपास 70 कार्यकर्ते यांनी शिवसेनेतून भाजपामध्ये प्रवेश केला आहे. तारळ, अनसुरे, मिठगावणे या गावातील हे कार्यकर्ते आहेत. प्रवेश केलेले कार्यकर्ते हे सेना आमदार राजन साळवी यांचे एकेकाळचे कट्टर समर्थक होते. राजापूरमध्ये झालेल्या या कार्यक्रमाला भाजपाचे जिल्हा उपाध्यक्ष रवींद्र नागरेकर, भाजयुमो जिल्हाध्यक्ष अनिकेत पटवर्धन, तालुकाध्यक्ष अभिजित गुरव आदी उपस्थित होते.
नाणारचे समर्थन केले म्हणून हकालपट्टी
गेली चार वर्ष राजापूर तालुक्यातील प्रास्तावित रिफायनरी प्रकल्पावरून राज्यातील राजकीय वातावरण ढवळून निघाले होते. शिवसेना या प्रकल्पाच्या विरोधात असली तरी या भागातील अनेक शिवसेना पदाधिकारी, शिवसैनिक या प्रकल्पाच्या बाजूने आहेत. काहींनी तर उघड समर्थन केले म्हणून त्यांची पक्षातून हकालपट्टी करण्यात आली. त्यामध्ये सागवे विभागप्रमुख राजा काजवे, जिल्हा परिषद सदस्या मंदा शिवलकर यांसारख्यांचा समावेश होता. राजापूर तालुक्यात रिफायनरी झाली पाहिजे, असे या कार्यकर्त्यांचे मत आहे. पण शिवसेनेची नवीन जागेबाबत भूमिका अद्याप देखील स्पष्ट नाही. त्यामुळे राजा काजवे, पंढरीनाथ आंबेरकर यांसारख्या जवळपास 70 ते 80 पदाधिकारी, शिवसेना कार्यकर्ते यांनी भाजपामध्ये प्रवेश केला आहे. त्यामुळे शिवसेनेला कोकणात धक्का बसला आहे.