रत्नागिरी -राष्ट्रीय महामार्ग विभागाचे कार्यकारी अभियंता आर. के. बाममे आणि महाडचे उप विभागीय अभियंता प्रकाश गायकवाड यांना दमदाटी करून नवीन जगबुडी पुलाच्या रेलिंगला बाधण्यात आले होते. या प्रकरणी खेडचे नगराध्यक्ष वैभव खेडेकर यांच्यासह अन्य दोघांना पोलिसांनी अटक केली.
अधिकाऱ्यांना पुलाच्या रेलिंगला बांधल्याचे प्रकरण: वैभव खेडेकर यांच्यासह दोघांना अटक शनिवारी 29 जूनला नवीन जगबुडी पुलाच्या जोडरस्त्याला मोठमोठी भगदाडे पडल्याचे निदर्शनास आले होते. यानंतर आमदार संजय कदम व नगराध्यक्ष वैभव खेडेकर यांनी भरणे नाका येथे महामार्गावर रास्ता रोको आंदोलन केले होते. दरम्यान वैभव खेडेकर आणि त्यांच्या काही कार्यकर्त्यांनी जगबुडी पुलाच्या जोड रस्त्याबाबतच्या निकृष्ट कामाला जबाबदार अधिकाऱ्यांना पुलाला बांधले होते. राष्ट्रीय महामार्ग विभागाचे कार्यकारी अभियंता आर. के. बामणे व महाडचे उपविभागीय अभियंता प्रकाश गायकवाड यांना दमदाटी करून नवीन जगबुडी पुलाच्या रेलिंगला बांधले होते. या घटनेचा व्हिडीओ सोशल मीडियावर व्हायरल झाला होता. यावेळी उपस्थित पोलीस कर्मचाऱ्यांनी प्रसंगावधान दाखवून या अधिकाऱ्यांची सुटका केली होती.
या घटनेची फिर्याद महाडचे उपविभागीय अभियंता प्रकाश गायकवाड यांनी दिल्यानंतर नऊ आंदोलनकर्त्यांवर गुन्हा दाखल करण्यात आला आहे. या गुन्ह्यात संशयित म्हणून नगराध्यक्ष वैभव खेडेकर, विश्वास मुधोळे, संतोष पवार, रहीम युसूफ सहिबोले, सागर प्रकाश कवळे, सुनील सीताराम चिले, राजेश बाळू कदम, शाम तुळशीराम मोरे, प्रमोद भार्गव दाभीळकर, राजेंद्र जगन्नाथ खेडेकर यांच्यावर १४३, १४७, १४९, ३५३, ३४२, ५०४, ५०६, १८६, १२० ब यासहित महाराष्ट्र पोलीस अधिनियम कलम ३७(१)(३) नुसार गुन्हा दाखल करण्यात आला आहे.
फिर्यादिनी दिलेल्या व्हिडिओ फुटेजच्या आधारे खेड पोलिसांनी ७ संशयितांना यापूर्वीच अटक केली आहे. नगराध्यक्ष वैभव खेडेकर, विश्वास मुधोळे व संतोष पवार या तिघांनी न्यायालयातून अंतरिम अटकपूर्व जामीन मिळवला होता. या अंतरिम अटकपूर्व जामीनाची मुदत आज 9 जुलैला संपणार असल्याने संशयितांच्या वकिलांनी मुदतवाढ मिळण्याकरता न्यायालयात अर्ज दाखल केला होता. मात्र, नगराध्यक्ष वैभव खेडेकर, विश्वास मुधोळे, संशयित संतोष यांचा हा अर्ज न्यायालयाने नामंजूर केला. नगराध्यक्ष वैभव खेडेकर, विश्वास मुधोळे,संशयित संतोष यांचा अर्ज न्यायालयाने फेटाळल्यानंतर खेड पोलिसांनी या तीघांना अटक केली आहे. बुधवारी त्यांना न्यायालयात हजर करण्यात येणार आहे.
